Ronald Kuman Gollandiya terma jamoasidagi faoliyatini Fransiyadan yirik hisobda mag‘lubiyatga uchragan holda (0:4) boshladi.
«Apelsinlar» amaldagi jahon vise-chempioniga qarshi safarda o‘yinning 21-daqiqasigacha uch marta gol o‘tkazib yubordi va yakunda 0:4 hisobida mag‘lub bo‘ldi.
Shu tariqa, Gollandiyaning 20 ta o‘yinga yetgan mag‘lubiyatsiz seriyasi (qo‘shimcha vaqt va penaltilar seriyasini hisobga olmaganda) bugun uzildi.
E’tiborlisi, 20 o‘yinning barchasi jamoa asosiy vaqtda hech qachon mag‘lub bo‘lmagan Lui van Gal ishlagan davrga to‘g‘ri kelgan.
Gollandiyaning oldingi mag‘lubiyati 2021 yil iyuniga to‘g‘ri keladi - o‘shanda jamoa Yevro-2020 o‘yinida Chexiyaga yutqazgan (0:2), Frank de Bur esa murabbiy bo‘lgan.
