Xabaringiz bor, Londonning "Chelsi" klubi APL 29-turida o‘z maydonida "Aston Villa"ga imkoniyatni boy berib qo‘ydi — 0:2. Ushbu mag‘lubiyatning ertasiga jamoa bosslari bosh murabbiy Grem Potterni ishdan bo‘shatish haqida qaror qabul qilishdi. Hozirda amerikalik tadbirkor Todd Boeli egalik qiladigan klub bir varakayiga 5 ta top murabbiy bilan muzokaralar olib bormoqda.
Angliyaning The Telegraph nashri xabariga ko‘ra, yangi murabbiy tayinlash bo‘yicha qarorni texnik direktor Lourens Styuart va sport direktori Pol Uinstenli qabul qiladi. Boeli bu ishlarga umuman aralashmaydi.
Nashr bosh murabbiylik uchun favorit sifatida "Leypsig"da Lorens bilan birga ishlagan Yulian Nagelsmanni ko‘rsatmoqda.
Avvalroq Nagelsmann "Bavariya"dan ishdan bo‘shatilganidan keyin tanaffusga chiqib, mavsum oxirigacha murabbiylikka qaytmasligi haqida xabar berilgandi.
Biroq “Chelsi” nemis mutaxassisi bilan muzokara olib borishga harakat qilmoqchi. Qayd etilishicha, Nagelsmanning "Bavariya"dan chetlatilishi "Chelsi"ning Grem Potterni ishdan bo‘shatish haqidagi qaroriga ta’sir qilmagan.
Boshqa nomzodlar orasida Maurisio Pochettino va Luis Enrike ham bor. Ma’lumotlarga ko‘ra, “ko‘klar” rahbarlari sentyabr oyida Pochettino bilan muzokaralar olib borishgan, biroq yakunda Potterni tanlagan.
Shuningdek, “Napoli” ustozi Luchano Spalletti va “Ayntraxt” ustozi Oliver Glasner bilan ham muzokaralar o‘tkazish rejalashtirilgan.
Yaqin vaqt ichida "Chelsi" rahbariyati nomzodlarning qaysi biri klubga ko‘proq mos kelishini aniqlash uchun har bir nomzodning yondashuvini tahlil qilishni rejalashtirmoqda. Yakuniy qaror tez kunda qabul qilinadi, ungacha esa jamoani Chempionlar ligasida turnir qirollari "Real Madrid" kutib turibdi.
