Ertaga Toshkentda ayollar futboli bo‘yicha Parij-2024 Olimpiya o‘yinlariga yo‘llanma beruvchi saralash musobaqasining birinchi bosqichi start oladi. Bugun «A» guruhidan o‘rin olgan O‘zbekiston, Iordaniya, Butan va Sharqiy Timor jamoalarining bosh murabbiylari ishtirokida matbuot anjumani bo‘lib o‘tdi. Unda terma jamoamiz ustozi Midori Xonda bo‘lajak musobaqaga tayyorgarlik haqida gapirib o‘tdi.

«Bu o‘yinlarga qadar 1 yil mobaynida o‘quv-mashg‘ulot yig‘inlarini o‘tkazdik. Yig‘inlar doirasida turli o‘rtoqlik uchrashuvlari tashkil etildi. Umuman olganda, bu bosqichga yetarlicha hozirlik ko‘rdik, deya olaman. Yig‘inlar doirasida raqiblarni o‘rganib, shogirdlarimga ular haqida batafsil ma’lumot berib keldik. Raqiblarni kuchsiz deb hisoblamaymiz. Xususan, qizlarimiz ham bunday fikrda emas. Tarkibda yo‘qotishlar yo‘q. Avval jarohat olgan qizlar umumiy tarkibga qaytishdi. Fursatdan foydalanib, barcha muxlislarni futbolchilarimizni qo‘llab-quvvatlash uchun stadionga chorlab qolaman», – dedi Midori Xonda.

Anjumanda futbolchilar nomidan jamoamiz yetakchisi sifatida ishtirok etgan Kamila Zaripova ham murabbiyning fikrlarini tasdiqlagan holda bo‘lajak bahslarga barcha tayyor ekani, har 3 o‘yinda faqat g‘alaba uchun maydonga tushishlarini bildirdi.

Eslatib o‘tamiz, ushbu bosqich doirasida O‘zbekiston terma jamoasining ilk o‘yini ertaga Butanga qarshi o‘tkaziladi. Uchrashuv «Paxtakor» stadionida soat 17:00 da start oladi.