"Eybar"ning 24 yoshli darvozaboni Luka Zidan "Real Madrid" akademiyasi bitiruvchisi bo‘lib, "qaymoqranglilar" tarkibida atigi ikkita o‘yin o‘tkazdi. Darvozabonning poytaxtdagi faoliyati yorqin kechmadi va Lukaning fikricha, mashhur otasi Zinedin Zidanning obro‘si uning faoliyatiga zarar yetkazgan.

"Futbol olamida meni Luka sifatida ko‘rishni xohlayman. Ishtirok etgan o‘yinlarimga qarab baho berishsin, hech kim bilan solishtirishmasin. Men haqimda hech narsa bilmay tanqid qiladiganlar bor. Ular meni noto‘g‘ri baholaydilar. Ular mening kimligimni bilishmaydi. Bir-ikkita o‘yin o‘ynaganimni ko‘rgan va qanday odam yoki futbolchi ekanligimni bilmaydigan odamlardan eshitish qiyin. Bolaligimdan bularning barchasidan uzoqroq turishga harakat qilardim... Lekin familiyam tufayli boshqa o‘yinchilardan kamroq himoyalanganman. Boshqa o‘yinchi haqida ular men haqimda gapirganday gapirishmaydi. Qaysi bir klub men bilan shartnoma imzolamoqchi bo‘lsa, bunday narsalar zarar yetkazishi mumkin.

Bu yana va yana takrorlanadi. Hamma joyda faqat otamning sharofati bilan nimadir olaman, deyishadi... Muvaffaqiyatga erishish uchun har kuni qilayotgan ishlarim ahamiyatsizdek tuyuladi. Men odamlarning fikrini hurmat qilaman, lekin bu so‘zlarni eshitish qiyin. Buni hazm qilish oson emas", - dedi Luka Zidan Relevo nashriga bergan intervyusida.

"Real Madrid" tomonidan "Rasing Santander"ga ijaraga berilgan, keyinroq "Rayo Valyekano"ga sotilgan Luka Zidan 2022 yilda "Eybar"ga o‘tdi. Hozir "Eybar" Segunda peshqadami hisoblanadi.