"Эйбар"нинг 24 ёшли дарвозабони Лука Зидан "Реал Мадрид" академияси битирувчиси бўлиб, "қаймоқранглилар" таркибида атиги иккита ўйин ўтказди. Дарвозабоннинг пойтахтдаги фаолияти ёрқин кечмади ва Луканинг фикрича, машҳур отаси Зинедин Зиданнинг обрўси унинг фаолиятига зарар етказган.
"Футбол оламида мени Лука сифатида кўришни хоҳлайман. Иштирок этган ўйинларимга қараб баҳо беришсин, ҳеч ким билан солиштиришмасин. Мен ҳақимда ҳеч нарса билмай танқид қиладиганлар бор. Улар мени нотўғри баҳолайдилар. Улар менинг кимлигимни билишмайди. Бир-иккита ўйин ўйнаганимни кўрган ва қандай одам ёки футболчи эканлигимни билмайдиган одамлардан эшитиш қийин. Болалигимдан буларнинг барчасидан узоқроқ туришга ҳаракат қилардим... Лекин фамилиям туфайли бошқа ўйинчилардан камроқ ҳимояланганман. Бошқа ўйинчи ҳақида улар мен ҳақимда гапиргандай гапиришмайди. Қайси бир клуб мен билан шартнома имзоламоқчи бўлса, бундай нарсалар зарар етказиши мумкин.
Бу яна ва яна такрорланади. Ҳамма жойда фақат отамнинг шарофати билан нимадир оламан, дейишади... Муваффақиятга эришиш учун ҳар куни қилаётган ишларим аҳамиятсиздек туюлади. Мен одамларнинг фикрини ҳурмат қиламан, лекин бу сўзларни эшитиш қийин. Буни ҳазм қилиш осон эмас", - деди Лука Зидан Relevo нашрига берган интервьюсида.
"Реал Мадрид" томонидан "Расинг Сантандер"га ижарага берилган, кейинроқ "Райо Вальекано"га сотилган Лука Зидан 2022 йилда "Эйбар"га ўтди. Ҳозир "Эйбар" Сегунда пешқадами ҳисобланади.