«Манчестер Юнайтед» ҳужумчиси Беньямин Шешко «Барселона»нинг қизиқишлар доирасига тушиб қолди.

«Кўк-анорранглилар»нинг асосий трансфер мақсади ҳамон Хулиан Альварес бўлиб турибди, бироқ «Атлетико»ни аргентиналик футболчини сотишга кўндириш осон бўлмайди. Marca нашри тарқатган хабарга кўра, Шешко Каталония гранди учун «матрасчилар» юлдузи борасидаги музокаралар муваффақиятсиз якунланган тақдирда захира вариантларидан бири ҳисобланади. «Барселона» раҳбарияти словениялик форвард Ханс-Дитер Фликнинг талабларига тўлиқ мос келади деб ҳисобламоқда.

Ўтган йилнинг ёзида «Манчестер Юнайтед» Беньямин Шешкони «РБ Лейпциг»дан 76,5 миллион евро эвазига сотиб олган эди. Якунланган мавсумда 23 ёшли футболчи «қизил иблислар» либосида 32 та учрашувда майдонга тушиб, 12 та гол ва 1 та голли узатмани ўз ҳисобига ёздириб қўйди.