Туркия терма жамоаси 2026 йилги Жаҳон чемпионатида ўз устидаги кучли руҳий босимни енгиб ўта олмади. «Боруссия Дортмунд» ва «Ливерпуль» клубларининг собиқ бош мураббийи Юрген Клопп шундай фикр билдирди.
Германиялик мутахассиснинг сўзларига кўра, турк футболчиларини ғалабага бўлган хоҳишнинг камлигида ёки майдонда бор кучини бермаганида айблаб бўлмайди.
«Босим жуда ҳайбатли эди ва улар буни кўтара олишмади. Улар ғалаба қозонишни шу қадар қаттиқ исташдики, натижада ҳимоя ва ҳужум ўртасидаги мувозанатни бутунлай унутиб қўйишди», — дея Клоппнинг сўзларини келтиради «Magenta TV».
Унинг қўшимча қилишича, айнан руҳий муаммолар Винченцо Монтелла жамоасига ўз ўйинини топиб олишига халақит берган.
Эслатиб ўтамиз, турклар гуруҳ босқичи стартидаги иккита ўйинда кетма-кет мағлубиятга учрашди. Энг ачинарлиси, улар рақиблар дарвозаси томон жами 62 та зарба йўллаб, бирорта ҳам гол ура олишмади. Туркия терма жамоаси гуруҳдаги навбатдаги ўйинини 26 июнь куни Тошкент вақти билан соат 05:00 да АҚШга қарши ўтказади.
