Xokkey bo‘yicha Qozog‘iston chempionatida ishtirok etgan "Humo" klubi mavsumni kumush medal bilan yakunladi. Astana shahrining «Nomad» klubiga qarshi finaldagi beshinchi o‘yin Toshkentda o‘tkazildi.

Bugun toshkentliklarga g‘alaba suv va havodek zarur edi. Boisi, dastlabki 4ta o‘yindan keyin qozog‘istonliklar 3:1 hisobida oldinga chiqib olishgan va bugungi g‘alaba ularga chempionlikni taqdim etardi.

Bahsning debyuti jamoamiz uchun muvaffaqiyatsiz chiqdi. "Nomad" xavfli qarshi hujum tashkil etib, 54-soniyadayoq hisobni ochdi. «Humo» esa hisobni tenglashtirish uchun yaxshi imkoniyatga ega bo‘ldi. Bir vaziyatda shayba to‘singa tegib qaytdi. Jamoamiz ikki marta son jihatdan ustunlikda o‘ynab, raqib darvozasiga yo‘l topa olmadi.

Uchinchi bo‘limda esa "Nomad" xokkeychilarimiz bizning hududda shayba uchun kurashda g‘olib chiqishdi va birinchi gol muallifi Runovni qulay vaziyatga chiqarishdi. Bu safar ham uning zarbasi aniq bo‘ldi.

«Humo» o‘yin so‘ngida darvozabon o‘rniga o‘yinchini tushirdi va oqibatda bo‘sh darvozadan uchinchi shaybani olib chiqadi.

«Nomad» darvozaboni Andrey Shutov bugun o‘z darvozasi tomon yo‘llangan 27ta zarbani bartaraf etdi. Umuman olganda, ushbu posbon finaldagi o‘yinlarda qahramonlik namoyish etdi.

Shu tariqa, finaldagi seriyada hisob 4:1 ko‘rinishiga yetdi va "Nomad" chempionlikni qo‘lga kiritdi. "Humo" esa kumush medallari bilan cheklandi.

Xokkey. Qozog‘iston chempionati. Final, 5-o‘yin
«Xumo» - «Nomad» 0:3 (0:1, 0:0, 0:2)
Gollar:
0:1 - 00:54 - Runov (Daniyar, Muxametov)
0:2 - 43:40 - Runov (Muratov, Muxametov)
0:3 - 59:25 - Rahmonov (Boyko) — bo‘sh darvoza

Seriyadagi hisob — «Xumo» - «Nomad»: 1-4 (3:2 OT1, 3:6, 1:2 OT3, 0:2, 0:3)