Superliganing 6-turi doirasida o‘z maydonida “Surxon”ga qarshi maydonga tushib 0:0 hisobida durang o‘ynagan “Qizilqum” klubi bosh murabbiyi Asror Aliqulov durang adolatli bo‘lgani, uchrashuvlarning boshlanish vaqtlari, Diyor Rahmatullayev va maydonga tushirilgan tajribali futbolchilar haqida fikr bildirdi.
"Bugun o‘yinni yaxshi boshladik, vaziyatni o‘z tomonimizga og‘dirishga harakat qildik, ammo buning uddasidan chiqa olmadik. Qolaversa, ikkinchi bo‘limda biroz charchab qoldik va to‘pni raqibga topshirib qo‘ydik. Umuman, durang adolatli bo‘ldi deya olaman”, - dedi murabbiy.
“Bugun uchrashuvning oxirgi daqiqalarida raqib charchab qolganidan foydalanishimiz lozim edi. Ammo, o‘yinni o‘z qo‘liga oladigan futbolchi, kreativlik yetishmadi. Shuni hisobga olib biroz tajribasi yuqori futbolchilarni maydonga tushirgan edim. Ular ishonchni unchalik oqlay olishmadi”.
“O‘yin vaqtlari bo‘yicha jamoalarga birdek imkoniyat berilyapti. Barchada imkoniyat bir xil. Shunchaki, futbolchilar o‘z jamoalariga professionallarcha munosabatda bo‘lsalar yetadi”.
“Diyor Rahmatullayevga imkon berilyapti. Avvalgi turda “Paxtakor”ga qarshi ham maydonga tushirgan edik. U zaxiradagi yagona vinger futbolchi. Unga imkoniyat berishga harakat qilayapmiz. Bugun uning pozisiyasiga Sherali Jo‘rayevni tushirdik. Chunki bugun bizga tajriba kerak edi” - dedi Aliqulov.
