Суперлиганинг 6-тури доирасида ўз майдонида “Сурхон”га қарши майдонга тушиб 0:0 ҳисобида дуранг ўйнаган “Қизилқум” клуби бош мураббийи Асрор Алиқулов дуранг адолатли бўлгани, учрашувларнинг бошланиш вақтлари, Диёр Раҳматуллаев ва майдонга туширилган тажрибали футболчилар ҳақида фикр билдирди.

"Бугун ўйинни яхши бошладик, вазиятни ўз томонимизга оғдиришга ҳаракат қилдик, аммо бунинг уддасидан чиқа олмадик. Қолаверса, иккинчи бўлимда бироз чарчаб қолдик ва тўпни рақибга топшириб қўйдик. Умуман, дуранг адолатли бўлди дея оламан”, - деди мураббий.

“Бугун учрашувнинг охирги дақиқаларида рақиб чарчаб қолганидан фойдаланишимиз лозим эди. Аммо, ўйинни ўз қўлига оладиган футболчи, креативлик етишмади. Шуни ҳисобга олиб бироз тажрибаси юқори футболчиларни майдонга туширган эдим. Улар ишончни унчалик оқлай олишмади”.

“Ўйин вақтлари бўйича жамоаларга бирдек имконият бериляпти. Барчада имконият бир хил. Шунчаки, футболчилар ўз жамоаларига профессионалларча муносабатда бўлсалар етади”.

“Диёр Раҳматуллаевга имкон бериляпти. Аввалги турда “Пахтакор”га қарши ҳам майдонга туширган эдик. У захирадаги ягона вингер футболчи. Унга имконият беришга ҳаракат қилаяпмиз. Бугун унинг позициясига Шерали Жўраевни туширдик. Чунки бугун бизга тажриба керак эди” - деди Алиқулов.