Xolandning kechagi rekordi haqida qisqacha to‘xtalamiz.

Har bir o‘yinga 1,14 gol - Premyer-ligada hech qachon bunday hujumchi bo‘lmagan!

Erling Xoland Premyer-ligada bir mavsumda urilgan eng ko‘p gol rekordini takrorladi.  «Lester» bilan o‘yinda norvegiyalik futbolchi APLdagi 31 va 32-gollarini kiritdi. Saloh 2017/2018 yilgi mavsumda ham xuddi shunday raqamga ega bo‘lgan. Premyer-liga bir mavsumi 38 turlik formatga o‘tganidan buyon boshqa hech kim buncha ko‘p gol ura olmagan.

42 tur o‘ynalgan APLda Endi Koul 1993/1994 yilgi mavsumda «Nyukasl» safida 34 ta gol urgan bo‘lsa, oradan bir yil o‘tib Alan Shirer «Blekbern» safida ham xuddi shunday natijaga erishgan. Shunday qilib, Xoland Salohning rekordini takrorladi, endi u qanday dovon sari intiladi?

33 gol - Premyer-liga (38 turlik format) bir mavsumining yangi rekordi;
34 ta gol – butun turnir tarixidagi rekordning takrorlanishi;
35 gol - yangi mutlaq rekord.
«Siti»ni Premyer-ligada yana sakkiz tur kutib turibdi. «Brayton», «Arsenal», «Fulxem», «Vest Xem», «Lids», «Everton», «Chelsi» va «Brentford» bilan o‘yinlar Xoland uchun sinov bo‘ladi.

Xoland «Siti» safida har bir o‘yinda o‘rtacha bittadan ko‘proq gol urmoqda. Biroq Gvardiola vaqti-vaqti bilan ikkinchi bo‘limda hujumchini almashtirib turibdi, shunga qaramay norvegiyalik futbolchi o‘z ishini qilishda davom etmoqda. Kecha murabbiy tanaffus vaqtida hujumchini almashtirdi.

Hozir norvegiyalik hisobida 28 ta o‘yinda 32 ta gol bor – bu o‘rtacha har bir o‘yinga 1,14 ta gol to‘g‘ri kelishini bildiradi. Premyer-ligadagi to‘purarlarning hech biri hali o‘rtacha har bir o‘yinda bittadan ko‘p gol ura olmagan. Bunga eng yaqin natija Xarri Keyn tomonidan amalga oshirilgan - 0,97 ta gol (2016/2017 yilgi mavsumda 30 ta o‘yinda 29 ta gol).