Холанднинг кечаги рекорди ҳақида қисқача тўхталамиз.

Ҳар бир ўйинга 1,14 гол - Премьер-лигада ҳеч қачон бундай ҳужумчи бўлмаган!

Эрлинг Холанд Премьер-лигада бир мавсумда урилган энг кўп гол рекордини такрорлади.  «Лестер» билан ўйинда норвегиялик футболчи АПЛдаги 31 ва 32-голларини киритди. Салоҳ 2017/2018 йилги мавсумда ҳам худди шундай рақамга эга бўлган. Премьер-лига бир мавсуми 38 турлик форматга ўтганидан буён бошқа ҳеч ким бунча кўп гол ура олмаган.

42 тур ўйналган АПЛда Энди Коул 1993/1994 йилги мавсумда «Ньюкасл» сафида 34 та гол урган бўлса, орадан бир йил ўтиб Алан Ширер «Блекберн» сафида ҳам худди шундай натижага эришган. Шундай қилиб, Холанд Салоҳнинг рекордини такрорлади, энди у қандай довон сари интилади?

33 гол - Премьер-лига (38 турлик формат) бир мавсумининг янги рекорди;
34 та гол – бутун турнир тарихидаги рекорднинг такрорланиши;
35 гол - янги мутлақ рекорд.
«Сити»ни Премьер-лигада яна саккиз тур кутиб турибди. «Брайтон», «Арсенал», «Фулхэм», «Вест Хэм», «Лидс», «Эвертон», «Челси» ва «Брентфорд» билан ўйинлар Холанд учун синов бўлади.

Холанд «Сити» сафида ҳар бир ўйинда ўртача биттадан кўпроқ гол урмоқда. Бироқ Гвардиола вақти-вақти билан иккинчи бўлимда ҳужумчини алмаштириб турибди, шунга қарамай норвегиялик футболчи ўз ишини қилишда давом этмоқда. Кеча мураббий танаффус вақтида ҳужумчини алмаштирди.

Ҳозир норвегиялик ҳисобида 28 та ўйинда 32 та гол бор – бу ўртача ҳар бир ўйинга 1,14 та гол тўғри келишини билдиради. Премьер-лигадаги тўпурарларнинг ҳеч бири ҳали ўртача ҳар бир ўйинда биттадан кўп гол ура олмаган. Бунга энг яқин натижа Харри Кейн томонидан амалга оширилган - 0,97 та гол (2016/2017 йилги мавсумда 30 та ўйинда 29 та гол).