Superliga 10-turidan o‘rin olgan “Navbahor” – “Surxon” (1:0) uchrashuvidan keyingi matbuot anjumanining birinchi qismida termizliklar bosh murabbiyi Sergey Sergeevich Arslanov ishtirok etib, jurnalistlarning savollariga javob berdi.

Sergey Sergeevich o‘z so‘zini odatdagidek o‘yin haqidagi fikrlari bilan boshladi.

— Hammaga xayrli kech. O‘yin borasida qisqacha to‘xtaladigan bo‘lsak, hammasi yaxshi va shu bilan birga, yomon bo‘ldi. Boisi, yaxshi deganda, yigitlarimizning uchrashuv yakunigacha kurash olib borishganini ta’kidlamoqchiman. “Navbahor”ning yaxshi shakllangan jamoa ekanligini barchamiz bilamiz. Bundan tashqari, bu yerda futbolni sevishadi, muxlislar astoydil jamoani qo‘llab-quvvatlab turishadi. Futbolchilarimiz harakat qilishdi, shunga qaramay, penaltidan urilgan gol butun o‘yin taqdirini hal etdi. Yomon, ya’ni salbiy jihat deganda, qoniqarsiz natijani nazarda tutyapman. Biz doim o‘z oldimizga yuqori maqsadlarni qo‘yamiz. Afsuski, bugun qimmatli ochkolarni qo‘lga kiritish nasib qilmadi. “Navbahor” jamoasi va uning muxlislarini g‘alaba bilan tabriklayman.

— “Navbahor”ning o‘yinlari borasida qanday fikrdasiz?
— Biz “Navbahor” tarixini yaxshi bilamiz. 1996 yili chempion bo‘lganida yulduzli tarkibga ega edi. Hozirgi rahbariyat va murabbiylar shtabi o‘sha chempionlikni qaytarishga urinishmoqda. “Navbahor” kuchli murabbiylar shtabiga ega, shuningdek, Samvel Babayanni yaxshi menejer va funksioner  sifatida bilamiz. Jamoada ko‘plab tajribali va individual jihatdan kuchli futbolchilar yig‘ilgan. Jamoa o‘yinini to‘liq o‘rganib chiqqandik, o‘yinni qanot orqali qurishini, tezkor futbolchilarga egaligini inobatga olgandik. Bugun qarshilik ko‘rsatish qiyin bo‘ldi. Birinchi bo‘limda juda qiynaldik, ikkinchi bo‘limda esa o‘yinda burilish hosil qildik. Shogirdlarimga hech qanday e’tirozim yo‘q. Muxlislarimizga ham katta rahmat, ularga samimiy minnatdorchilik bildiraman.

— “Navbahor”ning joriy mavsumdagi chempionlik imkoniyatlarini qanday baholaysiz?
— Sal oldin aytganimdek, jamoada kuchli murabbiylar va futbolchilar jamlangan. Samvel Babayan har bir detallarga e’tibor qaratadi. Himoya yoki himoyadan hujumga chiqish, umuman, hammasiga e’tibor qaratadi. 1996 yilgi chempionlikni qaytarish uchun hammasi yetarli.

— Ortda qolgan turlarni inobatga olgan holda, “Surxon” uchun eng og‘ir o‘tgan o‘yin qaysi bo‘ldi deb o‘ylaysiz?
— Men qaysidir bahsni ajratib ko‘rsatolmayman. Har bir o‘yin qiyin kechmoqda. Ishoning, har bir bellashuv juda qiyin o‘tadi. Ayniqsa, Namanganda juda qiyin, chunki muxlislar bosimini ham his etasiz.

— “Surxon” tarkibidan asosan yosh va mahoratli  futbolchilar o‘rin olishgan, Yaxshi o‘ynayotgan futbolchilarga grand jamoalardan takliflar bo‘lishi mumkin. Shu holatda qanday yo‘l tutasiz? Ularni qo‘yib yuborasizmi?
— Biz jamoamiz a’zolarining futbolchi sifatida o‘sishi tarafdorimiz. Agar kuchliroq jamoadan taklif tushsa, bunga qarshilik qilmaymiz. Bu klubimiz falsafasi desak ham bo‘ladi. “Surxon” futbolchilar uchun o‘ziga xos “tramplin” bo‘lib bersa, bundan faqat xursand bo‘lamiz.

“Navbahor” PFK matbuot xizmati.