Bundesligadagi chempionlik intrigasi nolinchi yillardagi bir mavsumni eslatib yubordi.

«Bayer» «Bavariya»ga raqobat qilib yurgan paytlar. So‘nggi turgacha «Bavariya» peshqadam bo‘lib borgan, oxirgi turda «Myunxen 1860» maydoniga safar uyushtirishgandi. U paytlarda jonli efirlar kam, o‘yinni ertasi kuni ko‘rganman. Qizig‘i, «Bayer» chempion bo‘lganini qayerdandir eshitib qoldim, demak Myunxenda nimadir bo‘lgan, ko‘rish kerak.

Xullas, o‘yin boshlandi, «Bavariya» hisobni ochdi. Ammo men bilamanku, yakunni, demak, rosa qiziq bo‘lgan. O‘yin oxirlagan sari, harorat oshib boryapti, nima, qanday qilganikin «Myunxen 1860»?

So‘nggi daqiqalarda «Bavariya» ikkinchi golni urdi. Hakam 4 daqiqa qo‘shib berdi. Dahshat. Nahotki hozir men hech qachon unutilmaydigan voqea guvohi bo‘laman? Uchta golni mezbonlar qachon uradi?

Yo‘q, xato ma’lumot ekan. «Bayer» chempion bo‘lmagan. O‘yin 0:2 ligicha tugadi (Oxirgi marta keyin bunaqa tuyg‘uni «Kloverfild 10» filmini ko‘rganimda his qildim, tavsiya, qiziq kino).

Xullas, yana shunaqa bo‘ldi. Baribir «Dortmund»ga ishongandim oxirigacha. 6 ta o‘ta xavfli vaziyatdan birortasini golga aylantirganda ham, oxirida imkoniyat bo‘lardi...

Menimcha, bugun «Borussiya» kurashgani emas, bayram qilgani tushgandi. Zo‘r stadion, ajoyib muxlislar, hech narsa kerak bo‘lmagan, to‘rt turdan beri faqat yutqazayotgan qulay raqib. Yut va chempion bo‘l!

«Mayns» kutilmaganda, kurash taklif qilgach, jamoa o‘ziga kela olmadi. O‘sha kurashuvchanlik modini vaqtida yoqa olmadi. Hatto stadion ham o‘ziga o‘xshamagandek, ba’zi pallalarda ustiga quyilgan sovuq suvni his qilib o‘tirishdi. Faqat so‘nggi yarim soat yetarli emas, albatta.

«Bavariya» qatorasiga 11-marta chempion. 4 tur oldin «Bavariya»ni yutgan «Mayns» qarzini qaytardi.

Dortmunddagi stadionni bu holatda hech ko‘rmagandim. O‘yin tugagach. To‘la va jimjit.

Qahramon Aslanov.