Yevropa Ligasining final uchrashuvida “Sevilya” Vengriyaning Budapesht shahrida “Roma”ni penaltilar seriyasida mag‘lub etdi.

Musobaqa hamda klublarga oid raqamlar

Yevropa Ligasi / UYEFA Kubogi tarixida birinchi marta qatorasiga uch mavsumda g‘olib penaltilar seriyasi orqali aniqlandi.

Final uchrashuvida 13 marta sariq kartochka ko‘rsatildi va bu musobaqaning rekordiga aylandi. Bungacha Yevropa Ligasi tarixidagi hech qaysi o‘yinda bunchalik ko‘p ogohlantirish berilmagan. Bahsda “Roma” futbolchilari yetti marta sariq kartochka oldi. Bu bir klub uchun rekord hisoblanadi.

Ispan jamoalari 2001 yildan beri boshqa mamlakat klublariga qarshi o‘tgan qatorasiga 18-finalda g‘olib chiqmoqda. So‘nggi marta 2000/01 yilgi mavsumda Chempionlar Ligasi finalida “Bavariya” “Valensiya”ni, UYEFA Kubogi finalida esa “Liverpul” “Alaves”ni mag‘lub etgandi.

Ispan klubi 14 marta Yevropa Ligasi/UYEFA Kubogi bosh sovriniga ega chiqdi. Angliya va Italiya klublari 9 marta, Germaniya jamoalari esa 7 marta ushbu sovringa ega chiqqan.

“Sevilya” o‘z tarixida yettinchi marta Yevropa Ligasi / UYEFA Kubogi g‘olibiga aylandi (2006, 2007, 2014, 2015, 2016, 2020 va 2023). Bu rekord hisoblanadi. Shuningdek, klub bir marta Yevropa Superkubogida ham g‘olib chiqqan. Klub ichki musobaqalarda jami yettita sovringa ega chiqqan.

“Sevilya” kelasi mavsum “Barselona”, “Real”, “Atletiko” va “Real Sosyedad” bilan birga YECHLda ishtirok etadi. Jamoa ayni vaqtda La Ligada 11-o‘rinda bormoqda.

“Roma” penaltilar seriyasigacha yetib borgan ikkinchi finalda mag‘lub bo‘ldi. Jamoa 1983/84 yilgi mavsumda Yevropa Chempionlar Kubogi finalida “Liverpul”ga penaltilar seriyasida yutqazgan.

Futbolchi va murabbiylarga oid faktlar

“Sevilya” ustozi Xose Luis Mendilibar murabbiylik faoliyatidagi birinchi sovrinini qo‘lga kiritdi. Mutaxassis Andalusiya klubiga 2023 yilning mart oyida tayinlangandi. Shuningdek, 62 yoshli murabbiy musobaqada g‘olib chiqqan eng keksa mutaxassisga aylandi.

“Roma” bosh murabbiyi Joze Mourinyo faoliyati davomida birinchi marta Yevrokuboklar finalida mag‘lub bo‘ldi. Portugaliyalik mutaxassis bungacha beshta finalda g‘olib chiqqandi. U “Portu” bilan UYEFA Kubogida va Chempionlar Ligasida, “Inter” murabbiyligida Yevropa Chempionlar Ligasida, “Manchester Yunayted” boshqaruvida Yevropa Ligasida, “Roma” ustozi sifatida Konferensiyalar Ligasida g‘alaba qozongandi.

“Sevilya” futbolchisi Gonsalo Montiel hal qiluvchi penaltini golga aylantirdi. Futbolchi Argentina terma jamoasi safida 2022 yilda Qatarda bo‘lib o‘tgan Jahon Chempionati finalida ham so‘nggi penaltini tepib, gol urgandi.

“Roma” futbolchisi Janlukka Manchini Yevropa Ligasi finalida o‘z darvozasiga gol urib qo‘ygan ikkinchi futbolchiga aylandi. Bungacha 2018/19 yilgi mavsum finalida “Inter” futbolchisi Romelu Lukaku “Sevilya”ga qarshi o‘yinda avtogol kiritgan.