"Chelsi"ning sobiq hujumchisi, hozir esa "Roma"da o‘ynayotgan Temmi Abraxam Tumanli Albionga qaytishi mumkin, deb xabar bermoqda The Sun tabloidi.

Manbaning xabariga ko‘ra, 25 yoshli futbolchining xizmatlariga "Everton" qiziqish bildirmoqda. Mersisaydliklar Abraxamning transferi uchun 31 million yevro to‘lashga tayyor. "Roma" bu taklifga qanday munosabat bildirgani hozircha noma’lum.

Temmi 2021 yilning avgustidan beri Rim jamoasida o‘ynamoqda. Tomonlar o‘rtasidagi mehnat shartnomasi 2026 yil iyun oyi oxirigacha hisoblanadi.

Abraxam joriy mavsum Italiyada 37 ta o‘yinda maydonga tushib, 8 ta gol urdi va 3 ta golli uzatmani amalga oshirdi.