Tailandda bo‘lib o‘tadigan o‘smirlar o‘rtasidagi Osiyo Kubogi start olishiga sanoqli kunlar qoldi. O‘zbekiston U-17 terma jamoasi guruh bosqichida Yaponiya, Hindiston va Vyetnam vakillariga qarshi bahs olib boradi. Musobaqa oldidan jamoamiz Malayziyada so‘nggi yig‘inini o‘tkazadi.

Bugun O‘FA rahbariyati mazkur yirik musobaqa oldidan O‘zbekiston U-17 terma jamoasi a’zolari bilan uchrashdi. Uchrashuv avvalida oldimizda turgan ushbu musobaqaning mas’uliyati haqida fikr bildirildi. Jamoamiz turnirga yuqori darajada tayyorgarlik ko‘rib, Urugvay, Argentina, Polsha kabi davatlarida yig‘inlar tashkil etildi. Ushbu turnirda terma jamoamiz munosib ishtirok etgan holda yuqori o‘rinni qo‘lga kiritishga tilak bildirildi. Faxriylarimiz har bir futbolchi professionalizm, intilish va mehnatsevarlikni o‘zida mujassam qilgan holda maydonga tushishlari kerakligi, yurtimizdagi barcha futbol muxlislari jamoani qo‘llab-quvvatlab turushini aytdilar.

Shuningdek, O‘FA rahbariyati murabbiylar shtabi bilan jamoaning ayni paytdagi holati va tayyorgarlik jarayoni haqida suhbatlashdi. Tibbiy shtabga musobaqa davomida futbolchilarning sog‘lig‘i, tiklanishi va vitaminizasiyalash jarayoniga jiddiy e’tibor berish, yuqori darajada tibbiy yordam ko‘rsatish amaliyotini davom ettirishga ko‘rsatma berdi.

Uchrashuv yakunida O‘FA rahbariyati mas’uliyatli turnir oldidan jamoamizga yana bir bor omad tiladi.