Kazemiro 2022/23 mavsumda barcha musobaqalarda 7 gol va 6 assistni amalga oshirdi. Angliyadagi ilk mavsumida. “Real” faoliyatidagi bu borada eng zo‘r mavsumdan (2020/21 – 7+5) ham ko‘proq. Bu faqat raqamlarda.

Klublar miqyosida barcha sovrinni bir necha marta yutgan Kazemiro “MYU”ga o‘tib, “yangi chaqiriqlar uchun tayyor ekanini” aytganida, biroz g‘alati eshitilgan – yana nimaga erishish mumkin?

Ammo iloji bor ekan. Kazemiro “MYU”dagi faoliyati davomida shu paytgacha ochilmagan, balkim soyada qolgan, balkim e’tiborga olinmagan qirralarini ochdi. Ishi markazda raqibga halaqit berish va to‘pni egallaganda Modrich yo Kroosning eng yaqinda turganiga to‘pni yetkazish, ba’zida standart va uzoq masofalardan zarba berish bo‘lgan Kazemiro aslida yanayam serqirra futbolchi ekan. U o‘yin tempini boshqarishda, hujumlarni boshlashda, yakuniy pasda, ikkinchi tempda, qisqa qilib aytganda, to‘p nazoratida ham muhim figura bo‘la olar ekan. “Real”da tabiiyki, bu borada kuchliroq bo‘lgan Modrich va Kroos oldida sezilmagan, “MYU” esa, Kazemirosiz umuman boshqa, eski jamoaga aylanib qolaverdi.

“Real”da ham Kazemironing yo‘qligi biror o‘yin oldidan muammo sifatida ko‘p aytilardi, ammo markazdagi boshqa futbolchilar himoyalanishda qiynalib qolishlari mumkinligi nuqtai nazaridan.

Aytishlaricha, Kazemiro “MYU” bilan uch oy davomida muzokaralar olib borgan. Bir necha marotaba videoqo‘ng‘iroq orqali gaplashishgan. Mavsum boshida “Yunayted” avval “Brayton”ga 1:2, keyin esa, “Brentford”ga 0:4 yutqazgach, klubdagilar Kazemironing aynib qolishidan qo‘rqishadi. “Brentford” bilan o‘yinni Ispaniyada televizorda tomosha qilgan Kazemiro esa, darhol agentiga telefon qiladi: “Ularga ayt, men buni tuzataman”

“MYU” esa, balkim o‘zi bilmagan holda,  maydon markaziga yordam berishi mumkin bo‘lgan futbolchinigina emas, haqiqiy yetakchini sotib oldi.

Videodagi no look pass ga qarang. Bu – yangi Kazemiro.

Qahramon Aslanov.