"Real Madrid" va "Barselona" Ispaniya Superkubogidan tushgan mablag‘ning bir qismini "Malyorka"ga o‘tkazadi.
Bu haqda "Malyorka"ning biznes direktori Alfonso Dias ma’lum qildi.
"Ular olingan mablag‘ning bir qismini biz va "Atletik" bilan bo‘lishadi, ammo men tafsilotlarga to‘xtalmayman.
Buni federasiya belgilaydi va biz kelishuvni ko‘rmagan bo‘lsak-da, shartlar o‘tgan yilgidek bo‘lishini ta’minlashga harakat qildik", - dedi Dias.
Diario Sport nashri xabariga ko‘ra, "Real" va "Barselona" "Malyorka"ga har biri 200 ming yevrodan o‘tkazadi - shu tariqa, klub Ispaniya Superkubogida ishtirok etgani uchun 1,3 million yevro olishi kafolatlangan. Avvalgi mavsumda "Osasuna" turnirning boshqa ishtirokchilaridan qo‘shimcha to‘lovlar olgan.
Ispaniya Superkubogi Saudiya Arabistonida 8-12 yanvar kunlari bo‘lib o‘tadi. Turnirning yarim finalida “Barselona” 8 yanvar kuni “Atletik” bilan, 9 yanvar kuni “Real Madrid” “Malyorka” bilan o‘ynaydi.
