Norvegiyada 10 nafar grossmeyster ishtirokidagi o‘tkazilayotgan nufuzli «Norway Chess» turniri yakunlanishiga bir tur qoldi. Kecha sportchilar 8-tur bahslarini o‘tkazishdi.

Nodirbek Abdusattorov bu safar AQSHlik sportchi Xikaru Nakamuraga qarshi oq donalarda o‘ynadi. Asosiy o‘yinning 55-yurishiga kelib tomonlar durangga imzo chekishdi.

Armageddon deb nomlangan qo‘shimcha partiyada esa hamyurtimiz g‘alaba qozonishga muvaffaq bo‘ldi hamda o‘z hisobiga 1,5 ochkoni qo‘shib qo‘ydi.

Natijada Nodirbek ochkolarini 7,5 taga yetkazib oldi, ammo Abdusattorov hamon 9-pog‘onani egallab turibdi. U bugun bo‘lib o‘tadigan 9-tur doirasida Magnus Karlsenni asosiy partiyada mag‘lub etsa (qora donalarda), turnirni biroz yuqoriroq pog‘onada yakunlashi mumkin. Aks holda vatandoshimiz «Norway Chess» musobaqasida 9-o‘rin bilan cheklanadi.