Superliga 13-turidan o‘rin olgan “Surxon” – “So‘g‘diyona” (1:0) uchrashuvidan so‘ng mezbonlar bosh murabbiyi Sergey Arslonov o‘z fikrlarini bildirib o‘tdi.

“O‘yin qiyin va asabiy o‘tdi. Buning ustiga asosiy vaqtga 14 daqiqa qo‘shib berildi. Jismoniy va ruhiy jihatdan ko‘p kuch sarfladik. Birinchi bo‘limda ko‘proq to‘psiz o‘ynab, himoyaga e’tibor qaratgan bo‘lsak, ikkinchi taymda esa raqib darvozasi oldida xavfli vaziyatlar yaratdik. Bugun raqib ham yaxshi harakat qildi, qolaversa, o‘rtadagi yuzaga kelgan katta tanaffus ham o‘z so‘zini aytdi. Nazorat bahslarida esa munosabat boshqacha bo‘ladi.

Birinchi bo‘limda Nimeli qiynaldi. Ikkinchi bo‘limda esa unga vaziyatlar etishmagan bo‘lsada, himoya va hujum o‘rtasidagi bog‘lovchi vazifasini bajarib berdi. Aynan u tufayli himoyadan chiqib, xavfli vaziyatlar yarata boshladik. Ha, u charchab qoldi. Maydonga ikkinchi hujumchi tushishi o‘yinimizni kuchaytira oldi. Ularning biri to‘pni saqlagan bo‘lsa, ikkinchisi raqibni aldashga harakat qildi. 20 kundan so‘ng rasmiy bahsda maydonga tushish nafaqat futbolchilarga, balki murabbiylarga ham qiyin.

Silvanus chempionatimizdagi to‘purar hujumchilardan sanaladi. Uni nafaqat “Navbahor, balki, boshqa ko‘plab jamoalar o‘z safida ko‘rishni istamoqda. Ular rahbariyatimizga murojaat qilib, bu borada muzokara o‘tkazishlari mumkin.

Birinchi navbatda mahalliy yoshlarga e’tibor qaratamiz. Keyin esa turli yoshdagi terma jamoa vakillarini olib kelishga intilamiz. So‘nggi variant – legioner. Ayni damda legionerlar bo‘yicha barcha pozisiyalarimiz band. Shu sababli ular haqida o‘ylayotganimiz yo‘q”, – dedi Arslonov.