Суперлига 13-туридан ўрин олган “Сурхон” – “Сўғдиёна” (1:0) учрашувидан сўнг мезбонлар бош мураббийи Сергей Арслонов ўз фикрларини билдириб ўтди.

“Ўйин қийин ва асабий ўтди. Бунинг устига асосий вақтга 14 дақиқа қўшиб берилди. Жисмоний ва руҳий жиҳатдан кўп куч сарфладик. Биринчи бўлимда кўпроқ тўпсиз ўйнаб, ҳимояга эътибор қаратган бўлсак, иккинчи таймда эса рақиб дарвозаси олдида хавфли вазиятлар яратдик. Бугун рақиб ҳам яхши ҳаракат қилди, қолаверса, ўртадаги юзага келган катта танаффус ҳам ўз сўзини айтди. Назорат баҳсларида эса муносабат бошқача бўлади.

Биринчи бўлимда Нимели қийналди. Иккинчи бўлимда эса унга вазиятлар этишмаган бўлсада, ҳимоя ва ҳужум ўртасидаги боғловчи вазифасини бажариб берди. Айнан у туфайли ҳимоядан чиқиб, хавфли вазиятлар ярата бошладик. Ҳа, у чарчаб қолди. Майдонга иккинчи ҳужумчи тушиши ўйинимизни кучайтира олди. Уларнинг бири тўпни сақлаган бўлса, иккинчиси рақибни алдашга ҳаракат қилди. 20 кундан сўнг расмий баҳсда майдонга тушиш нафақат футболчиларга, балки мураббийларга ҳам қийин.

Силванус чемпионатимиздаги тўпурар ҳужумчилардан саналади. Уни нафақат “Навбаҳор, балки, бошқа кўплаб жамоалар ўз сафида кўришни истамоқда. Улар раҳбариятимизга мурожаат қилиб, бу борада музокара ўтказишлари мумкин.

Биринчи навбатда маҳаллий ёшларга эътибор қаратамиз. Кейин эса турли ёшдаги терма жамоа вакилларини олиб келишга интиламиз. Сўнгги вариант – легионер. Айни дамда легионерлар бўйича барча позицияларимиз банд. Шу сабабли улар ҳақида ўйлаётганимиз йўқ”, – деди Арслонов.