O‘zbekiston so‘nggi yillarda FIFA va OFK miqyosidagi nufuzli musobaqalarni yurtimizda qabul qilish yuzasidan katta qadamlarni tashlamoqda. Xususan, yurtimiz 2024 yilgi futzal bo‘yicha Jahon chempionati mezboni etib belgilandi. Shu munosabat bilan bugun FIFA mutaxassislari Jeyme Gonsalez, Kasra Asrar va Laura Saez O‘zbekistondagi mavjud infratuzilmani o‘rganish, tahlil qilish va yakuniy xulosalarini taqdim etish maqsadida yurtimizga tashrif buyurishdi.

O‘FA mas’ullari bilan bo‘lib o‘tgan uchrashuv avvalida O‘zbekiston so‘nggi davr mobaynida qit’a miqyosidagi bir nechta turnirlarni yuqori saviyada qabul qilgani alohida e’tirof etildi. Futzal bo‘yicha JCH esa O‘FA hamda FIFA o‘rtasidagi o‘zaro ishonchga asoslangan hamkorlikning yangi bosqichga chiqqanligidan dalolatligi aytildi.

O‘FA birinchi vise-prezidenti Ravshan Irmatov Osiyo kubogi musobaqalarini o‘tkazish orqali yetarli tajriba orttirilgani, futzal bo‘yicha Jahon chempionatini ham yuksak saviyada o‘tkazish bo‘yicha barcha harakatlar amalga oshirilishini ta’kidladi.

Shundan so‘ng keyingi yil yurtimizda bo‘lib o‘tadigan mundialga tayyorgarlik rejalari muhokama qilindi. Dastlab FIFA va O‘FA vakillaridan iborat ishchi guruh tomonidan «Humo» arena, «Yunusobod» sport majmuasi, «Alpomish» muz saroyi va mashg‘ulot maydonlari inspeksiya qilindi. Maydonlar holati, kiyim almashtirish, matbuot anjumani va tashkiliy-ma’muriy xonalar, muxlislar uchun qulayliklar va xizmat ko‘rsatish ob’ektlari o‘rganib chiqildi.

Rejaga muvofiq endilikda Farg‘ona, Andijon, Samarqand va Buxorodagi mavjud sharoitlar inspeksiya qilinadi. FIFA vakillari majmualar, mashg‘ulot zallari, mehmonxonalar, aeroport, vokzal va yo‘llarning talabga javob berishini o‘rganadilar hamda yakuniy xulosalarini taqdim etadilar.