Ko‘plab futbolchilar butsalarini devorga ilishi bilan murabbiylik qiladi yoki soha mutaxassisi sifatida ishlay boshlaydi. Ayrimlar o‘zlarini aktyorlikda ham sinab ko‘rar ekan. Teleshoulardan tortib, seriali filmlargacha, yillar davomida ko‘plab futbolchilar ularda ishtirok etib kelmoqda. Quyida ularning eng mashhurlarini yig‘dik. Ularning bir qismi hali ham futbolchilik qilsa, qolganlari allaqachon faoliyatini yakunlagan yoki vafot etgan.
Lionel Messi
Bu dunyoda u eplay olmaydigan ish bormi o‘zi? Hozir Messi oldingiga qaraganda yanada mukammalashdi. Chunki futbolchi sohadan boshqa joylarda ham o‘zini sinab ko‘ra boshladi. Lionel Messi argentinaliklar tomonidan ishlangan "Los Protectores" (himoyachilar) komedik-dramasida ko‘rinish bergan. Ko‘rishni tavsiya qilamiz.
Devid Bekxem
Bekxem futboldan tashqaridagi sohalar, xususan, biznesda muvaffaqiyat qozongan. Ammo rol o‘ynashdachi? Unchalik ham emas. Afsonaviy sobiq futbolchi ko‘plab teleshoularda ishtirok etgan. Uning ilk to‘liq metrajli filmda rol ijro etishi 2017 yilga to‘g‘ri keladi. O‘shanda Bekxem "Qirol Artur: qilich afsonasi" filmida qatnashgandi. Ko‘pchilik tomoshabinlar bu chiqishni tanqid ostiga olgandi.
Neymar
Braziliya super-yulduzi 2019 yilda ilk marta ispaniyalik kinoijodkorlar tomonidan ishlangan "Pul ӯg‘rilari" nomli kriminal-dramada qatnashadi. Kinoda Neymar tomonidan ishlatilgan "Men futbol va bayramlarni yoqtirmayman" jumlasiga e’tibor bergan bo‘lsangiz, o‘zingizni kulgidan to‘xtata olmaysiz.
Pele
Braziliyalik afsona kameradan uyaladigan inson emasdi. Pele faoliyatini tugatishga yaqin qolgan yillarida bir nechta kinolarda qatnashadi. Ular ichida "G‘alabadan qochish" (1981, tepada) va "Kichik mo‘jiza" filmlarini alohida ta’kidlash joiz. Ular abadiy yodimizda qoladi.
Tyerri Anri
Anri o‘zining CBS kanalidagi muxbirligi bilan hammaning e’tiborida bo‘lib kelmoqda. Sobiq futbolchi faqatgina shu bilan cheklanmaydi. U 1999 yillarda fransuz komediyasida rol o‘ynagan.
Ian Rayt
"Arsenal" afsonasi yillar davomida bir nechta loyihalarda qatnashib kelmoqda. Rayt "Ted Lasso" filmida ko‘rinish bergan. Shuningdek, premyerasi kutilayotgan Daniel Kaluuyaning "Oshxona" filmida ham uning ishtiroki mavjud. Kutib qolamiz...
Olive Jiru
https://twitter.com/i/status/1063089288420704261
36 yoshida ham gollar urishdan charchamayotgan qahramonimiz, futbol o‘ynashdan boshqa ishlarni ham yaxshi eplaydi. Xususan, u 2018 yilda "O‘rgimchak odam" filmida yashil goblin obrazini gavdalantirib, unga ovoz bergandi. O‘sha paytda hujumchi "Chelsi" futbolchisi edi.
ISMATOV J.
