Germaniya chempionati elit ligasida mavsum-2022|2023 chindan ham, g‘ayrioddiy tus oldi. Aslida start chizig‘ida chempionlik poygasi «intriga»dan xoli o‘tishi taxmin qilingan edi. Amalda «Bavariya»ning tez-tez ko‘zda tutilmagan yo‘qotishlarga yuz tutgani kurash taftini keskin oshirib yubordi, faqat «Borussiya» D. yakunda dongdor raqibning «bo‘sh»ligidan foydalanolmadi. Umuman, chempionatda boshqa e’tiborga molik voqealar ham yetarlicha kuzatildi.
Mavsumning eng yaxshi jamoasi - «Bavariya». Ko‘pchilik Myunxen klubi chempionlik unvonini asossiz ravishda ilib ketgani haqida tinmay va’z o‘qishi mumkin, ammo aslida bunday xulosa o‘rinli emas. Ha, «Bavariya» bu safar «Kumush tovoq»ni so‘nggi tur o‘yinining so‘nggi daqiqasida urgan goli evaziga o‘z tomoniga og‘dirdi. Lekin bunda qanday adolatsizlik bor? Dortmund «Borussiya»sining vujudga kelgan zo‘r imkoniyat qadriga yetmagani esa - boshqa masala. Qolaversa, «rekordmayster» Bundesligada urilgan (92ta) va qo‘yib yuborilgan (38ta) gollar, to‘pni nazorat qilish (61 foiz) va yakkakurashlardagi ustunlik (3841ta), qo‘yingki, barcha muhim ko‘rsatkichlar bo‘yicha eng yaxshi statistikaga erishdi. Qisqasi, raqamlarni o‘z ichiga olgan ma’lumotlarga qarasak, «Bavariya»ning navbatdagi chempionlik marrasi ham tasodifiy emasligi oydinlashadi.
Eng yaxshi to‘purarlar - Niklas Fyullkrug, Kristofer N~Kunku. Nufuzli individual sovrin bu safar ikki goleador mulkiga aylandi. Faqat bitta farqi shuki, «Verder»ning germaniyalik yetakchisi Niklas Fyullkrug raqiblar darvozasini 16 marta nishonga olish uchun chempionat doirasida 28 marta maydonga tushgan bo‘lsa, «RB Leypsig» yarim himoyachisi Kristofer N~Kunku kamroq o‘yin sarfladi. Ya’ni fransiyalik hujumkor futbolchiga 25ta uchrashuv kifoya qildi. To‘purarlar poygasida shuningdek, «Ayntraxt» vakili Randal Kolo-Muani va «Frayburg» hujumchisi Vinchenso Grifo ham oxirigicha kurashishdi, faqat ular yakunda yetakchilardan 1ta gol darajasida ortda qolishdi. Aytish kerak, N~Kunku «RB Leypsig» bilan xayrlashdi va yangi mavsumni «Chelsi»da boshlaydi. Ehtimol, bu holat Bundesligada to‘purar bo‘lishga da’vogarlar bahsiga qo‘shimcha shiddat bag‘ishlar, to‘g‘ri, agar «Bavariya» yozda o‘z tarkibiga «yangi Levandovski» qo‘shib olmasa...
Eng yaxshi assistent - Rafael Gerreyru. Dortmund «Borussiya»sining portugaliyalik himoyachisi chempionat davomida 12ta samarali uzatma to‘pladi. Kolo-Muaniga bu yo‘nalishda ham atigi 1 ochko yetishmadi - fransiyalik legioner 11ta assist marrasida to‘xtadi. Jamol Musiala («Bavariya») va Florian Kayns («Kyoln») esa 10tadan gol hammualifi bo‘lib, assistentlar ro‘yxatida kuchli uchlikdan joy olishdi. Rafael Gereyruga alohida to‘xtalsak, u «Borussiya»dan ketishga ulgurdi. Portugaliyalik legioner oldida variantlar ko‘p edi va u «Bavariya»ga o‘tish asnosida Bundesligada qolishni ma’qul ko‘rdi. Tabiiyki, bu «arilar» uchun jiddiy yo‘qotish hisoblanadi.
Eng yaxshi darvozabon - Mark Flekken. Uncha tanilmagan kiperning haqli g‘alabasi. Binobarin, «Frayburg» darvozaboni 13ta o‘yinda gol qo‘yib yubormay, jamoasi natijalariga katta hissa qo‘shdi. Keyingi o‘rinda 12ta «quruq» o‘yin to‘plagan «Volfsburg» vakili Kun Kastels. Kiperlar orasida 3-yaxshi natija esa Gregor Kobel («Borussiya» D.) va Frederik Rennov («Union»)ga tegishli - 11tadan «quruq» o‘yin. Alohida ta’kidlash kerak, Mark Flekkenning ishonchli harakatlari hisobiga «Frayburg» 2-marta YELda qatnashish huquqini qo‘lga kiritdi. Biroq jamoa endi uning xizmatidan foydalanolmaydi - niderlandiyalik kiper yangi mavsumni «Brentford»da boshlaydi. APL vakili Mark transferiga 13 mln. yevro to‘ladi.
Mavsum taraq-qiyoti - «Union». Bundesligada 2019 yili debyut qilgan Berlin klubi tobora yuqoriga ko‘tarilmoqda. Elit ligadagi dastlabki mavsumni 11-o‘rinda yakunlagan «Union» 1 yildan so‘ng 7-pog‘onani band etgandi. 2020|2021 yillar mavsumida esa «xalq jamoasi» mavsumni 5-o‘rinda yakunlab, o‘z tarixida ilk marta YEL yo‘llanmasini qo‘lga kiritdi. Mana, «Union» yakunlangan mavsum kuchli kvartetdan joy oldi va endi CHLdagi debyutga shaylanmoqda. Qolaversa, berlinliklar Bundesliga ikkinchi davrasida chempionlikka ham da’vogarlik qilishdi. Tabiiyki, bu yaqindagina elitaga ko‘tarilgan jamoa uchun jiddiy taraqqiyotdir.
Mavsum shiddati - «Bayer». Leverkuzen klubida Xabi Alonso ish boshlaganidan keyin keskin siljish kuzatilganini alohida ta’kidlash kerak. «Bayer» rahbariyati Bundesliga bilan yaxshi tanish, lekin top-chempionatlarda ishlash tajribasi yo‘q yosh murabbiyga ishonch bildirib, katta tavakkalga qo‘l urgandi. O‘zi jamoada boshqa yo‘l ham qolmagandi. Zero, «dorishunoslar» o‘tgan yilning oktyabrida chuqur inqiroz holatiga tushdilar. Amalda ispaniyalik mutaxassis bir urinishda barchasini to‘g‘ri yo‘lga qo‘ydi va «Bayer»ni jadval tubidan 7-pog‘onaga ko‘tardi. Bundan tashqari, «dorishunoslar» Alonso boshqaruvida YEL yarim finaliga ham chiqishdi. Shu tariqa Alonso nomdor jamoalar e’tiboriga tushdi. To‘g‘ri, uning o‘zi yaqinda faoliyatini hali «Bayer»da davom ettirishini ma’lum qildi.
Mavsum omadsizi - «Borussiya» D. Bu masalada boshqa variantni ko‘rsatish mumkin emas. Axir «Borussiya» shundoq qo‘lida turgan chempionlikni berib qo‘ydi - chinakam omadsizlik. Axir «Bavariya» so‘nggi yillardagi eng yomon mavsumlaridan birini o‘tkazdi - murabbiylar almashuvi, kelishmovchiliklar, o‘yin sifatining pasayishi, rahbariyatga bog‘liq iste’folar... Bularning barchasi «arilar» uchun cheksiz imkoniyatlar yaratgandi. Qo‘shimchasiga, «Borussiya» oxirgi turdan oldin «rekordmayster»dan 2 ochko ilgarilab ketgan va finishda motivasiyasi qolmagan «Mayns»ni yengsa, chempion bo‘lardi. Biroq «arilar» 25-daqiqaga qadar 2ta gol qo‘yib yuborib, oddiy ko‘ringan vazifani o‘ta murakkablashtirishdi. Yakunda «Borussiya» muvozanatni tikladi, ammo g‘alaba golini urishiga vaqt qolmadi. «Bavariya» esa so‘nggi o‘yinni sehrli tarzda o‘z foydasiga hal qilish asnosida to‘plar nisbati bo‘yicha chempionlikni ilib ketdi. Yangi mavsum natijalarini oldindan taxmin qilish qiyin. Lekin Dortmund klubining salkam 100 foizli imkoniyatni boy berganiga guvoh bo‘lgan muxlislar uzoq vaqt afsuslanishlari tayin. «Bavariya» esa rahbariyatdagi o‘zgarishlarni yakuniga yetkazadi, tarkibni kuchaytiradi va Tomas Tuxel rahbarligida yangi mavsum tayyorgarligini talab darajasida o‘tkazadi katta ehtimol.
BUNDESLIGA-2022|2023 YAKUNI
Chempion: «Bavariya»
CHLga yo‘llanma: «Bavariya», «Borussiya» D., «RB Leypsig», «Union»
YELga yo‘llanma: «Fray-burg»
KLga yo‘llanma: «Bayer»
Bundesliga 2ga qulash: «Shalke», «Gerta» («Shtutgart» «pley-off» o‘yini orqali o‘z o‘rnini saqlab qoldi)
Sodiq SOBIR tayyorladi
