Ayni vatqda jamoasiz qolgan futbolchilar ham yetarlicha topiladi. Biz esa, yozgi transferlar oynasida erkin agentga aylangan mashhur futbolchilar haqida tanishtirib chiqamiz.

David De Xea

De Xea yaqindagina "ozod qush"ga aylandi. Uning "Manchester Yunayted" bilan shartnomasi 30 iyunga qadar amalda edi. Tomonlar shartnomani uzaytrish borasida kelisha olmadi, garchi davrozabon mish-mishlarga ko‘ra maoshini qisqartirishga ham tayyor edi. 32 yoshli futbolchi klub iltimosiga ko‘ra erkin fgentga aylandi. De Xea "Manchester Yunayted"dagi 12 yillik faoliyatdan so‘ng o‘ziga yangi klub izlashga majbur. Ammo professional davrozabon uchun bu unchalik muammo bo‘lmasligi mumkin. Yakuniga yetgan mavsum APLning eng yaxshi darvozaboni uzoq vaqt ishsiz yurmaydi.

Isko

Isko anchadan beri erkin agent bo‘lib kelgan. 2022 yil oxirida futbolchi "Sevilya"ni tark etdi va shundan beri klubsiz. Ajablanarlisi shundaki, unga biror jamoadan taklif kelib tushmagan. Bo‘lgan taqdirda ham uni rad etgan. Qishda unga Bundesliga klublari xaridor edi. "Leypsig" va "Union" jamoalari Iskoni safiga qo‘shib olishga tayyor edi. Ammo u Germaniyaga bormadi. Oxirgi xabarlarga ko‘ra, 31 yoshli yarim himoyachi "Rayo Valyekno" bilan kelishuvga erishgan, lekin hali rasman e’lon qilinganicha yo‘q. Balki Isko boshqa klublardan takliflarni kutayotgandir, lekin "Rayo Valyekano" ham yaxshi variant.

Jordi Alba

Alba yakuniga yetgan mavsum oxirida "Barselona"ni tark etgandi. Ko‘pchilik 34 yoshli himoyachining keyingi manzili "Inter Mayami" deb bilmoqda. Eslatib o‘tamiz, AQSH klubiga Jordining eski jamoadoshlari Messi va Buskets o‘tgan edi. Ammo Alba transferi borasida rasman e’lon qilinganicha yo‘q. Himoyachiga ayni vaqtda Yevropa klublaridan ham takliflar bor. Futbolchi hali bir qarorga kelganicha yo‘q.

Jessi Lingard

Lingard 2022 yilning yozida "Manchester Yunayted"ni tark etgach, "Nottingem Forest" bilan 1 yillik shartnoma imzolagandi. "O‘rmonchilar" APLda qolish uchun kurash olib bordi va "qizil iblislar"dan kelgan futbolchi "Nottingem"ga hech qanday yordam bera olmadi. 30 yoshli yarim himoyachi yakuniga yetgan mavsum APLda 17 ta o‘ynda maydonga tushib gol ura olmadi, ammo Liga Kubogi doirasida 2 ta gol urishga muvaffaq bo‘ldi. O‘tgan yili Lingardga da’vogarlar ko‘p edi. Bu yozda futbolchiga xaridorlar juda kam.

Xames Rodriges

So‘nggi vaqtlarda Xames tez-tez klubini o‘zgartirib turibdi. 2020 yilda "Everton"ga, 2021 yilda "Al Rayyan"ga, 2022 yilda "Olimpiakos"ga o‘tdi va 2023 yilda erkin agentga aylandi. Gresiya chempionati doirasida 31 yoshli yarim hmioyachi 17 ta o‘yinda 5 ta gol va 5 ta golli uzatmani amalga oshirdi. Kolmbiyalik futbolchi Yevropada faoliyatini davom ettirmoqchi. Keyingi vaqtlarda unga birorta taklif bo‘lmagan. Ammo Yaqin Sharqda unga bir qancha xaridorlar bor.

Eden Azar

2019 yilda "qaymoqranglilar" uni "Chelsi"dan 115 million yevroga sotib olganini hisobga olsak, Azarning transferi "Real" uchun eng omadsiz xaridlardan biri sanaladi. 4 yil davomida "Qirollik klubi" safida jami bo‘lib, bor-yo‘g‘i 76 ta o‘yin o‘tkazib 7 ta gol urdi va 12 ta golli uzatmani amalga oshirdi. Madrid jamoasi belgiyalikdan butunlay boshqacha o‘yin kutishgandi. Hamkorlik shu darajada muvaffaqiyatsiz bo‘ldiki, tomonlar shartnoma muddati tugamasdan xayrlashdi. 32 yoshli futbolchi faoliyatini yakunlashi haqida mish-mishlar bor. Shu bilan birga, Azarning o‘zi ham yuqori saviyada o‘ynash uchun kuch va ishtiyoq borligini ta’kidladi.

Serxio Ramos

Ramos so‘nggi 2 mavsumni PSJda o‘tkazdi. 37 yoshli himoyachi jamoasidagi ishonchli futbolchiga aylandi. Serxio "Sevilya"ga qaytish niyati borligini aytdi, ammo "nevionlar" uni sotib olmoqchi emas. Klub o‘z tarbiyalanuvchisini hurmat qiladi, lekin jamoaga qaytarishni rejalashtirmayapti. Shuningdek, futbolchiga "Inter Mayami" qiziqish bildirgani haqida xabarlar bor. U yana Messi bilan jamoadosh bo‘lishi mumkin.

Aleksis Sanches

Aleksis yakuniga yetgan mavsumni "Marsel"da o‘tkazdi va jamaosining Chempionlar ligasiga chiqishga katta hissa qo‘shdi. 34 yoshli hujumchi yakuniga yetgan mavsum Liga1 da 35 ta o‘yinda maydonga tushib, 14 ta gol urdi va 3 ta golga assistentlik qildi. Qolaversa, u avval Fransiya chempionatida o‘ynamagan. Ayni vaqtda "Marsel" va Sanches o‘rtasida yangi shartnoma borasida muzokaralar olib borilmoqda. Agar shartnoma yangilanmasa, u erkin agentga aylanadi.

Diyego Kosta

Kosta faoliyati davomida ko‘plab klublarda o‘ynadi. 2021 yilning avgustida Diyego "Atletiko Mineyro"ga o‘tdi va Yevropaga qaytmaydigandek ko‘rindi. Ammo 2022 yil sentyabrida "Vulverxempton"dan taklif oldi hamda braziliyalik u yerda erkin agent sifatida o‘ynadi. 34 yoshli hujumchi o‘tgan mavsumda APLda 23 ta o‘yinda maydonga tushib, 1 ta gol urgan. Albatta, Kosta klub umidlarini oqlay olmadi. shuning uchun u yana erkin agentga aylandi. Aleksisga o‘xshab, Diyego istasa yangi klub topa oladi, ammo ispaniyalik faoliyatini tugatish haqida ham o‘ylamoqda.

Yozgi transferlar oynasi hali yopilmadi va yuqorida sanab o‘tilgan "ozod qushlar" o‘ziga yangi klub topish imkoniyatiga ega. Buyog‘ini vaqt ko‘rsatadi. Ko‘ramiz, kuzatamiz...