Yozgi transfer bozorida bir necha klublar Leverkuzenning "Bayer" klubi hujumkor yarim himoyachisi Mussa Diabi uchun kurash olib bormoqda. Nufuzli insayder Fabrisio Romanoning ijtimoiy tarmoqlarda xabar berishicha, Diabi uchun "Aston Villa" ikkinchi taklifini yuborgan. Oldinroq leverkuzenliklar Birmingem jamoasining 35 million yevro va bonuslar taklifini rad etgandi. "Villa" ikkinchi taklif qabul qilinishiga umid qilishmoqda, aks holda klub Jeremi Doku variantiga o‘tishi mumkin.
Ayni paytda “An-Nasr” ham 24 yoshli Diabi uchun kurash olib bormoqda. Krishtianu Ronaldu to‘p tepayotgan Saudiya klubi ham futbolchi uchun katta maosh bilan yangi taklif bilan chiqdi.
Mussa Diabi Transfermarkt ekspertlari tomonidan 50 million yevroga baholangan.
