Saudiya Arabistoni bir mavsum uchun Kilian Mbappega 1 milliard yevro sarflashga tayyor. Bu esa hujumchi, dunyoning eng mashhur jamoalarining tarkibi qiymatidan qimmatroq degani. Bu qanday bo‘ladi? Pro-liganing amaldagi chempionlari bo‘lgan "Al-Hilol" Mbappeni 300 million yevroga sotib oladi. Keyin esa, unga bir mavsum uchun 700 million yevro to‘laydi. Shuningdek, ular hujumchini keyingi yozda tekinga qo‘yib yuboradi. Ana shu tarzda 1 yilda 1 milliard bir futbolchi uchun sarflanadi va bu ayrim klublar tarkibidan qimmatroq qiymatdir. Quyida ularni bilib olasiz.
"Real" – 980 million yevro
"Qirollik klubi" tarkibining qimmatligi bo‘yicha dunyoda "Arsenal", "Manchester Siti" va "PSJ"dan keyingi, uchinchi o‘rinda turadi. La-liga giganti safida Vinisius, Bellingem, Rodrigo, Tchuameni kabi qiymati baland futbolchilar bor. Agarda ularning yoniga Mbappe qo‘shiladigan bo‘lsa, qimmatlik darajasi yanada oshadi.
"Bavariya" – 934 million yevro
Bundesliganing doimiy chempionlari bo‘lgan "Bavariya", tarkibini sekinlik bilan yangilay bordi. Ayni damda "eski firqa" vakillaridan faqatgina Tomas Myuller va Manuel Noyer bor xolos. Ammo ularning narxi qimmat emas. Biroq, tarkibning yosh vakillari bo‘lgan Jamal Musiala, Alfonso Devis va Matteys de Ligt kabi nomlar haqida bunday deyish mushkul.
"Barselona" – 870 million yevro
"Barselona"ning yaqin mavsumlardagi moliyaviy qiyinchiliklari haqida ko‘p gapirildi. Tarkibni boyitish uchun yangi xaridlar qilish kerak. Ammo bu xaridlarni ro‘yxatdan o‘tkazish muammoga aylanishi mumkin. Rahbariyatning progressiv siyosati sababli katta ish haqi oladigan Lionel Messi, Serxio Buskets va Jordi Alba kabi nomlar bilan xayrlashildi. Hozir yoshlarga suyanilmoqda. Xavi jamoasining umumiy tarkib qiymati esa hali milliard yevroga yetmadi.
"Liverpul" – 846 million yevro
Klub rahbariyati Klopp kelganidan beri transferlar uchun jami 666 million yevro sarfladi. Yaqin kunlarda Romeo Laviya uchun yana 45 milliondan voz kechilishi kutilmoqda. Hozirgi tarkib avvalgisiga qaraganda ancha qimmatlashgan. Narxning bunday oshishi, Aleksander-Arnold, Endryu Robertson, Xarvi Elliot va Kyurtis Jonslarning qimmatlashgani bilan izohlanadi.
"MYU" – 845 million yevro
Faqatgina "PSJ", 1 milliard yevrolik o‘lchov bilan, oxirgi davrda tarkibni qayta qurish uchun "Manchester Yunayted"dan ko‘proq pul sarfladi. Ha, klubning o‘ta beqaror o‘yinlari tarkib qiymatiga ta’sir qiladi. Masalan, yirik pulga xarid qilingan Antoni, Jeydon Sancho va Xarri Maguayr hali ham tanqid qilinadi. Ammo jamoada, akademiyadan chiqqan Reshford va Garnacho kabi qiymatli vakillar ham mavjud.
ISMATOV J.
