Саудия Арабистони бир мавсум учун Килиан Мбаппега 1 миллиард евро сарфлашга тайёр. Бу эса ҳужумчи, дунёнинг энг машҳур жамоаларининг таркиби қийматидан қимматроқ дегани. Бу қандай бўлади? Про-лиганинг амалдаги чемпионлари бўлган "Ал-Ҳилол" Мбаппени 300 миллион еврога сотиб олади. Кейин эса, унга бир мавсум учун 700 миллион евро тўлайди. Шунингдек, улар ҳужумчини кейинги ёзда текинга қўйиб юборади. Ана шу тарзда 1 йилда 1 миллиард бир футболчи учун сарфланади ва бу айрим клублар таркибидан қимматроқ қийматдир. Қуйида уларни билиб оласиз.
"Реал" – 980 миллион евро
"Қироллик клуби" таркибининг қимматлиги бўйича дунёда "Арсенал", "Манчестер Сити" ва "ПСЖ"дан кейинги, учинчи ўринда туради. Ла-лига гиганти сафида Винисиус, Беллингем, Родриго, Тчуамени каби қиймати баланд футболчилар бор. Агарда уларнинг ёнига Мбаппе қўшиладиган бўлса, қимматлик даражаси янада ошади.
"Бавария" – 934 миллион евро
Бундеслиганинг доимий чемпионлари бўлган "Бавария", таркибини секинлик билан янгилай борди. Айни дамда "эски фирқа" вакилларидан фақатгина Томас Мюллер ва Мануэль Нойер бор холос. Аммо уларнинг нархи қиммат эмас. Бироқ, таркибнинг ёш вакиллари бўлган Жамал Мусиала, Альфонсо Девис ва Маттейс де Лигт каби номлар ҳақида бундай дейиш мушкул.
"Барселона" – 870 миллион евро
"Барселона"нинг яқин мавсумлардаги молиявий қийинчиликлари ҳақида кўп гапирилди. Таркибни бойитиш учун янги харидлар қилиш керак. Аммо бу харидларни рўйхатдан ўтказиш муаммога айланиши мумкин. Раҳбариятнинг прогрессив сиёсати сабабли катта иш ҳақи оладиган Лионель Месси, Серхио Бускетс ва Жорди Алба каби номлар билан хайрлашилди. Ҳозир ёшларга суянилмоқда. Хави жамоасининг умумий таркиб қиймати эса ҳали миллиард еврога етмади.
"Ливерпуль" – 846 миллион евро
Клуб раҳбарияти Клопп келганидан бери трансферлар учун жами 666 миллион евро сарфлади. Яқин кунларда Ромео Лавия учун яна 45 миллиондан воз кечилиши кутилмоқда. Ҳозирги таркиб аввалгисига қараганда анча қимматлашган. Нархнинг бундай ошиши, Александер-Арнольд, Эндрю Робертсон, Харви Эллиот ва Кюртис Жонсларнинг қимматлашгани билан изоҳланади.
"МЮ" – 845 миллион евро
Фақатгина "ПСЖ", 1 миллиард евролик ўлчов билан, охирги даврда таркибни қайта қуриш учун "Манчестер Юнайтед"дан кўпроқ пул сарфлади. Ҳа, клубнинг ўта беқарор ўйинлари таркиб қийматига таъсир қилади. Масалан, йирик пулга харид қилинган Антони, Жейдон Санчо ва Харри Магуайр ҳали ҳам танқид қилинади. Аммо жамоада, академиядан чиққан Рэшфорд ва Гарначо каби қийматли вакиллар ҳам мавжуд.
ИСМАТОВ Ж.
