"Манчестер Сити" вингери Жереми Доку Англия Суперкубоги доирасида "Арсенал"га қарши ўтган учрашувда болдир мушагидан жароҳат олди. Бу ҳақда Nieuwsblad хабар берди.
Манбага кўра, бельгиялик футболчи камида Англия Премьер-лигасининг "Борнмут"га қарши навбатдаги ўйинини ўтказиб юборади.
Доку "Арсенал"га қарши баҳсни омадсиз ўтказди ва танаффусда алмаштирилди. "Манчестер Сити" эса мазкур учрашувда 0:3 ҳисобида мағлуб бўлди.
Сўнгги вақтларда футболчи бир қатор соғлиқ муаммоларига дуч келди. Аввал у оғир нафас йўллари инфекцияси сабаб шошилинч тиббий ёрдам бўлимига мурожаат қилган, кейин эса тўпиқдан жароҳат олган. Шу сабабли Доку жамоа билан тўлиқ мавсумолди тайёргарлигини ўтай олмаган.
"Манчестер Сити"да футболчининг сўнгги жисмоний муаммолари янги жароҳат юзага келишига таъсир қилган бўлиши мумкин, деб ҳисоблашмоқда.
