"Нефтчи" бош мураббийи Исломбек Исмоилов Суперлига 18-туридан ўрин олган "Бухоро"га қарши учрашувдан сўнг матбуот анжуманида иштирок этиб, йирик мағлубият сабабларини изоҳлади.
Мутахассис аввало рақибни ғалаба билан табриклаб, жамоасининг ҳимояда йўл қўйган қўпол хатолари натижага жиддий таъсир қилганини таъкидлади.
"Аввало, рақиб жамоасини ғалаба билан табриклайман. Албатта, бу биз учун аламли мағлубият. Ҳимояда қўпол хатоларга йўл қўйдик. Қачондир бундай ҳолат бўлиши керак эди, афсуски, бугунга тўғри келди. Лекин жамоа бундай йирик мағлубиятга лойиқ эмас эди", — деди Исмоилов.
Мураббий асосий таркибнинг бир қатор футболчилари ўйинда иштирок этмаганини мағлубият учун баҳона сифатида кўрсатмаслигини билдирди.
"Бу баҳона бўла олмайди. Чунки таркибимизда уларнинг ўрнини боса оладиган футболчилар бор. Ҳар қандай ҳолатда ҳам бундай ҳисобда мағлуб бўлмаслигимиз керак эди.
"Бухоро" асосан қарши ҳужумларга таянди. Биринчи таймда ўйинни тўлиқ назорат қилдик. Бир хато сабаб пенальтидан гол ўтказдик, кейин эса ҳисобни тенглаштирдик.
Иккинчи бўлимни ҳам яхши бошлашга ҳаракат қилдик, аммо оддий вазиятдаги хатодан кейин бурчак тўпи бўлди ва рақиб гол урди. Кейин учинчи голни ҳам ўтказиб юбордик. Буларнинг барчаси оддий хатолар эди. Тўртинчи гол эса умуман кулгили вазиятдан келиб чиқди: тўпни эгаллаб туриб, рақибга бериб қўйдик ва улар гол урди. Менимча, барчаси индивидуал хатолар оқибати. Лекин умумий олиб қараганда, ёмон ўйнадик, деб ўйламайман", — деди у.
Исмоилов 4:1 ҳисобидаги мағлубият жамоага психологик жиҳатдан таъсир қилиши мумкинлиги ҳақидаги саволга ҳам жавоб берди.
"Таркибимиздаги футболчилар профессионал. Бу ҳолатдан имкон қадар тезроқ чиқиб кетишга ҳаракат қиламиз. Бугунги ўйинни албатта таҳлил қиламиз, хатоларимиз устида ишлаймиз. Кейинги учрашувда мухлисларимиз олдида ғалаба қозонишга ҳаракат қиламиз", — деди "Нефтчи" устози.
Шунингдек, мураббий биринчи даврадаги ва бу галги "Бухоро"нинг ўйин услубида катта фарқ кўрмаганини қайд этди.
"Биринчи даврада ҳам "Бухоро" деярли худди шу услубда ўйнаганди. Ўшанда ҳам ҳисобни пенальтидан очган эди. Улар кўпроқ қарши ҳужумларга эътибор қаратиб, узун паслар орқали ўйнашга ҳаракат қилади. Мураббий ўша-ўша бўлгани учун ўйин услубида ҳам деярли ўзгариш йўқ", — деди Исломбек Исмоилов.
