"Neftchi" bosh murabbiyi Islombek Ismoilov Superliga 18-turidan o‘rin olgan "Buxoro"ga qarshi uchrashuvdan so‘ng matbuot anjumanida ishtirok etib, yirik mag‘lubiyat sabablarini izohladi.

Mutaxassis avvalo raqibni g‘alaba bilan tabriklab, jamoasining himoyada yo‘l qo‘ygan qo‘pol xatolari natijaga jiddiy ta’sir qilganini ta’kidladi.

"Avvalo, raqib jamoasini g‘alaba bilan tabriklayman. Albatta, bu biz uchun alamli mag‘lubiyat. Himoyada qo‘pol xatolarga yo‘l qo‘ydik. Qachondir bunday holat bo‘lishi kerak edi, afsuski, bugunga to‘g‘ri keldi. Lekin jamoa bunday yirik mag‘lubiyatga loyiq emas edi", — dedi Ismoilov.

Murabbiy asosiy tarkibning bir qator futbolchilari o‘yinda ishtirok etmaganini mag‘lubiyat uchun bahona sifatida ko‘rsatmasligini bildirdi.

"Bu bahona bo‘la olmaydi. Chunki tarkibimizda ularning o‘rnini bosa oladigan futbolchilar bor. Har qanday holatda ham bunday hisobda mag‘lub bo‘lmasligimiz kerak edi.

"Buxoro" asosan qarshi hujumlarga tayandi. Birinchi taymda o‘yinni to‘liq nazorat qildik. Bir xato sabab penaltidan gol o‘tkazdik, keyin esa hisobni tenglashtirdik.

Ikkinchi bo‘limni ham yaxshi boshlashga harakat qildik, ammo oddiy vaziyatdagi xatodan keyin burchak to‘pi bo‘ldi va raqib gol urdi. Keyin uchinchi golni ham o‘tkazib yubordik. Bularning barchasi oddiy xatolar edi. To‘rtinchi gol esa umuman kulgili vaziyatdan kelib chiqdi: to‘pni egallab turib, raqibga berib qo‘ydik va ular gol urdi. Menimcha, barchasi individual xatolar oqibati. Lekin umumiy olib qaraganda, yomon o‘ynadik, deb o‘ylamayman", — dedi u.

Ismoilov 4:1 hisobidagi mag‘lubiyat jamoaga psixologik jihatdan ta’sir qilishi mumkinligi haqidagi savolga ham javob berdi.

"Tarkibimizdagi futbolchilar professional. Bu holatdan imkon qadar tezroq chiqib ketishga harakat qilamiz. Bugungi o‘yinni albatta tahlil qilamiz, xatolarimiz ustida ishlaymiz. Keyingi uchrashuvda muxlislarimiz oldida g‘alaba qozonishga harakat qilamiz", — dedi "Neftchi" ustozi.

Shuningdek, murabbiy birinchi davradagi va bu galgi "Buxoro"ning o‘yin uslubida katta farq ko‘rmaganini qayd etdi.

"Birinchi davrada ham "Buxoro" deyarli xuddi shu uslubda o‘ynagandi. O‘shanda ham hisobni penaltidan ochgan edi. Ular ko‘proq qarshi hujumlarga e’tibor qaratib, uzun paslar orqali o‘ynashga harakat qiladi. Murabbiy o‘sha-o‘sha bo‘lgani uchun o‘yin uslubida ham deyarli o‘zgarish yo‘q", — dedi Islombek Ismoilov.