Yevrofutbol markazida rosa yayragan turkiyalik Arda Turon professional faoliyatini o‘tgan yili yakunlagandi.
Asosan «Atletiko» va «Barselona»dagi yorqin o‘yinlari bilan tanilgan sobiq vinger qisqa vaqtda mutlaqo «boshqa odamga aylangandek». Har holda, butsalarini mixga ilganiga hali 1 yil ham bo‘lmagan futbolchini bir qarashda tanish juda mushkul hozir...
Arda Turon samarali faoliyatini o‘tgan yilning sentyabr oyida to‘xtatdi. «Galatasoroy» uning uchun oxirgi professional klub bo‘lganini qo‘shimcha qilish joiz. Turon Turkiya chempionatiga yo‘l olishiga qadar 5 mavsum davomida «Barselona» sharafini himoya qilgan va 55ta o‘yinda 15ta gol urish asnosida La Liga chempioni maqomiga erishgan, qolaversa, Ispaniya kubogini 2 marta boshi uzra baland ko‘targan edi. Arda Turkiya milliy jamoasi tarixida ham yorqin iz qoldirdi. Deylik, mamlakat bosh jamoasi safida 100 marta maydonga tushgan vinger eng samarador futbolchilar ro‘yxatida kuchli 5talikka kirdi, shuningdek, turklarning Yevro-2008 yarim finaliga chiqishlariga katta hissa qo‘shdi.
36 yoshli Arda Turon endilikda Turkiya chempionati Ikkinchi divizioni ishtirokchisi «Eyupspor» klubini boshqarmoqda. Jamoa mashg‘ulotlari jarayonida olingan surati yaqinda ijtimoiy tarmoqlar mulkiga aylandi. Fotoga qarasak, Ardaning soqoli allaqachon oqarib ketgani ko‘rinadi. «Tvitter» foydalanuvchilari esa bu kadrdan hayratdalar. Ba’zilari ushbu surat Turonga tegishli ekanligiga ishonolmayotganlarini ham bayon etishdi. Axir Arda aslida Lionel Messi bilan tengdoshdir. Mana, ba’zi izohlarga e’tibor qarating:
- Yo‘q, u 46 yoshni urib qo‘ygan ko‘rinadi.
- Yo‘q, bo‘lishi mumkin emas.
- Akaxon hayotida uchinchi 10 yillikni o‘tkazib yuborib, darhol to‘rtinchi dekadaga sakragandek.
- Bu o‘sha Arda emas, aniq!
- Bu Jerar Butler.
