Megaiqtidor Lamin Yamal «Barselona» safida debyut qilganida, atigi 15 yoshda edi.
«Betis»ga qarshi kechgan o‘sha bahsda atigi 5 daqiqa harakatlangan yigitcha katta iqtidorini namoyish etishga ulgurgandi. Mana, Xavi yoqimtoyiga aylangan Yamal asta-sekin asosiy jamoa tarkibidan o‘ziga joy hozirlamoqda. Deylik, La Liga 2-turidan o‘rin olgan «Kadis»ga qarshi bahsda boshlang‘ich tarkibda maydonga tushdi. Fakt shuki, Yamal 21-asrda La Liga o‘yinini boshlang‘ich tarkibda boshlagan eng yosh futbolchi bo‘ldi (16 yoshu 38 kunlik). «Bolakay» o‘zini shu qadar tetik tutmoqdaki, uning 2007 yili tug‘ilganiga ishonish ham qiyin.
Mana, Lamin Yamal tug‘ilishiga qadar «Barselona»da nimalar bo‘lganiga qarab ham, uning qanchalik yosh ekanligini tushunish mumkin. Atigi 5ta faktga e’tibor qarating:
1). Yamal tug‘ilishiga qadar Lionel Messi «Barselona»ning 26ta rasmiy o‘yinida gol urishga ulgurgandi.
2). Yamal tug‘ilishiga qadar Xavi Kataloniya klubi safida 366ta o‘yin o‘tkazishga ulgurgandi.
3). Yamal tug‘ilishiga qadar Xosep Gvardiola «Barsu B» jamoasi boshqaruvini qo‘lga olishga ulgurgandi.
4). Yamal tug‘ilishiga qadar Ronaldinyo «Oltin to‘p» yutishga ulgurgandi.
5). Yamal tug‘ilishiga qadar «Barselona» CHLda «Arsenal»ni yutgandi.
«Barselona» bag‘ridagi yana bir iste’dod Pedri yana jarohatga yo‘liqib, kamida 1 oyga safdan chiqdi. Diqqat qiling, yarim himoyachi 2021-2023 yillar oralig‘ida 7 marta turli darajada jarohatlandi va jami 307 kun-ni «lazaret»da o‘tkazdi. Mavsum-2020|2021 esingizdami? 18 yoshli yigitcha dahshatli start olib, barcha turnirlar (jumladan, Olimpiadada) hisobidan 75ta o‘yinda qatnashgandi. Kattalar futbolidagi ilk mavsumda 75ta rasmiy uchrashuv! Bu raqamni to‘liq anglash uchun biroz vaqt kerak... Ko‘rinishidan, bu Pedri uchun o‘ta ko‘plik qilgan va organizmiga tushgan og‘irlik unga hamon muammolar keltirmoqda...
