Ertaga OFK Chempionlar ligasi guruh bosqichi 2-turi doirasida Namanganning “Navbahor” jamoasi Hindistonning “Mumbay Siti” klubiga qarshi bahs olib boradi.
Bugun mazkur o‘yin oldidan uchrashuvning tashkiliy masalalariga bag‘ishlangan yig‘ilish o‘tkazildi. Unda har ikki ishtirokchi jamoalar rahbariyati, “Markaziy” stadion vakillari, Namangan viloyati tartibni saqlash idoralari va tibbiyot sohasi mas’ullari ishtirok etishdi. Yig‘ilishda uchrashuv komissari gonkonglik Chan Ka Chung va o‘yin bosh koordinatori Zohirjon Akramxonov uchrashuvning tashkiliy jihatlari yuzasidan barcha zarur ma’lumotni taqdim etishdi.
Shuningdek, ertangi uchrashuvda jamoalar qanday rangdagi liboslarda maydonga chiqishi ham aniqlab olindi. Unga ko‘ra, “Navbahor” ertaga to‘liq ko‘k rangli libosda maydonga chiqadi. Hindistonlik futbolchilar esa qora rangdagi formada harakat qilishadi. “Navbahor” darvozaboni sabzirang forma kiysa, “Mumbay Siti” posboni sariq rangli libosda o‘ynaydi.
Eslatib o‘tamiz, “Navbahor” – “Mumbay Siti” uchrashuvi 3 oktyabr kuni soat 19:00 da Namangandagi “Markaziy” stadionida bo‘lib o‘tadi.
