Эртага ОФК Чемпионлар лигаси гуруҳ босқичи 2-тури доирасида Наманганнинг “Навбаҳор” жамоаси Ҳиндистоннинг “Мумбай Сити” клубига қарши баҳс олиб боради.

Бугун мазкур ўйин олдидан учрашувнинг ташкилий масалаларига бағишланган йиғилиш ўтказилди. Унда ҳар икки иштирокчи жамоалар раҳбарияти, “Марказий” стадион вакиллари, Наманган вилояти тартибни сақлаш идоралари ва тиббиёт соҳаси масъуллари иштирок этишди. Йиғилишда учрашув комиссари гонконглик Чан Ка Чунг ва ўйин бош координатори Зоҳиржон Акрамхонов учрашувнинг ташкилий жиҳатлари юзасидан барча зарур маълумотни тақдим этишди.

Шунингдек, эртанги учрашувда жамоалар қандай рангдаги либосларда майдонга чиқиши ҳам аниқлаб олинди. Унга кўра, “Навбаҳор” эртага тўлиқ кўк рангли либосда майдонга чиқади. Ҳиндистонлик футболчилар эса қора рангдаги формада ҳаракат қилишади. “Навбаҳор” дарвозабони сабзиранг форма кийса, “Мумбай Сити” посбони сариқ рангли либосда ўйнайди.

Эслатиб ўтамиз, “Навбаҳор” – “Мумбай Сити” учрашуви 3 октябрь куни соат 19:00 да Намангандаги “Марказий” стадионида бўлиб ўтади.