Xanchjoudagi Osiyo O‘yinlarida shaxmat bo‘yicha erkaklar va ayollar o‘rtasidagi musobaqada bugun 8-tur bahslari o‘tkazildi.

O‘zbekiston ayollar terma jamoasi Mo‘g‘ulistonga termasiga qarshi dona surib, qiyinchilik bilan g‘alaba qozondi — 2,5:1,5. Natijada qizlar jamoamizning ochkolari 10 taga. Jamoamiz ayni paytda 5-pog‘onani egallab turibdi. Vyetnam qo‘shimcha ko‘rsatkich evaziga 4-o‘rinni egallab turibdi. Qizlar bahsida so‘nggi tur oldidan Xitoy 15 ochko bilan peshqadam bo‘lib turgan bo‘lsa, Hindiston hisobida 13 ochko bor. Qozog‘iston esa 11 ochko bilan 3-o‘rinni egallab turibdi. O‘zbekiston ayollar terma jamoasi so‘nggi turda aynan Qozog‘istonga qarshi dona suradi. Bu bahsda ko‘p ehtimol bilan bronza medal taqdiri hal bo‘ladi.

O‘zbekiston erkaklar terma jamoasi esa Qozog‘iston terma jamoasi ustidan 3,5:0,5 hisobida g‘alaba qozondi. Shamsiddin Vohidov durang o‘ynagan bo‘lsa, qolgan shaxmatchilarimiz g‘alaba nashidasini surishdi.

Ushbu g‘alaba tufayli O‘zbekistonning ochkolari 12 taga yetdi. Jamoamiz jadvalda 3-pog‘onani egallab turibdi. Ushbu turda peshqadamlar Eron va Hindiston g‘alabaga erishishdi. Ularning hisobida mos ravishda 14 va 13 ochko mavjud. Erkaklar terma jamoamiz oxirga turda Tailandga qarshi dona suradi. Bu jamoa 5 ochko bilan 11-o‘rinni egallab turibdi.

9-turda jamoamiz g‘alaba qozonsa, kamida bronza medalini naqd qiladi. Eron va Hindiston termalari oxirgi turda ochko yo‘qotsa, yigitlarimiz kumush yoki oltin medallarini qo‘lga kiritishi mumkin.