Ханчжоудаги Осиё Ўйинларида шахмат бўйича эркаклар ва аёллар ўртасидаги мусобақада бугун 8-тур баҳслари ўтказилди.

Ўзбекистон аёллар терма жамоаси Мўғулистонга термасига қарши дона суриб, қийинчилик билан ғалаба қозонди — 2,5:1,5. Натижада қизлар жамоамизнинг очколари 10 тага. Жамоамиз айни пайтда 5-поғонани эгаллаб турибди. Вьетнам қўшимча кўрсаткич эвазига 4-ўринни эгаллаб турибди. Қизлар баҳсида сўнгги тур олдидан Хитой 15 очко билан пешқадам бўлиб турган бўлса, Ҳиндистон ҳисобида 13 очко бор. Қозоғистон эса 11 очко билан 3-ўринни эгаллаб турибди. Ўзбекистон аёллар терма жамоаси сўнгги турда айнан Қозоғистонга қарши дона суради. Бу баҳсда кўп эҳтимол билан бронза медаль тақдири ҳал бўлади.

Ўзбекистон эркаклар терма жамоаси эса Қозоғистон терма жамоаси устидан 3,5:0,5 ҳисобида ғалаба қозонди. Шамсиддин Воҳидов дуранг ўйнаган бўлса, қолган шахматчиларимиз ғалаба нашидасини суришди.

Ушбу ғалаба туфайли Ўзбекистоннинг очколари 12 тага етди. Жамоамиз жадвалда 3-поғонани эгаллаб турибди. Ушбу турда пешқадамлар Эрон ва Ҳиндистон ғалабага эришишди. Уларнинг ҳисобида мос равишда 14 ва 13 очко мавжуд. Эркаклар терма жамоамиз охирга турда Таиландга қарши дона суради. Бу жамоа 5 очко билан 11-ўринни эгаллаб турибди.

9-турда жамоамиз ғалаба қозонса, камида бронза медалини нақд қилади. Эрон ва Ҳиндистон термалари охирги турда очко йўқотса, йигитларимиз кумуш ёки олтин медалларини қўлга киритиши мумкин.