Osiyo O‘yinlarida erkin kurash bo‘yicha medallarga da’vogar bo‘lgan o‘zbekistonlik sportchilar ishtirok etishmoqda. Bugun erkaklar 4 vaznda bahslarda ishtirok etishmoqda.

Osiyo o‘yinlarining ikki karra g‘olibi Bekzod Abdurahmonov (74 kg) ilk bahsda bahraynlik, chorak finalda esa qozog‘istonlik sportchini mag‘lub etdi. Ammo hamyurtimiz yarim finalda yaponiyalik Kirin Kinoshitaga yutqazib qo‘ydi. Bekzod endi bronza medali uchun gilamga chiqadi.

86 kg. vaznda Javrail Shapiyev ham bronza medali uchun kurashadigan bo‘ldi. Hamyurtimiz ilk bahsda pokistonlik, chorak finalda qozog‘istonlik raqibni mag‘lub etdi. Yarim finalda Javrail hindistonlik Dipak Puniaga qarshi gilamga chiqib, qiyin kechgan bahsda 3-4 hisobida imkoniyatni boy berib qo‘ydi.

97 kg. vazda sportchimiz Magomed Ibragimovga ilk bosqichda kuchli raqib duch kelib qoldi. Eronlik Mujtaba Guleyjga qarshi bellashuvda vatandoshimiz birinchi bo‘limdan so‘ng 4:3 hisobida oldindi, ammo yakunda Magomed 7:13 hisobida imkoniyatni boy berdi. Eronlik kurashchi finalgacha yetib borgani uchun Ibragimovda bronza medali uchun kurashish imkoniyati yuzaga keldi.

125 kg.gacha bo‘lgan vaznda Hasanboy Rahimov yurtimiz sharafini himoya qilmoqda. U ilk bosqichda Janubiy Koreya (9:0), chorak finalda Yaponiya (5:0) a’zolarini mag‘lub etib, yarim finalga chiqdi. Final yo‘llanmasii uchun kurashda Hasanboy mo‘g‘ulistonlik Munxtarga yutqazib qo‘ydi (0:2). Shu bois, Rahimov bronza medali gilamga chiqadi.

Medallar uchun bellashuvlar Toshkent vaqti bilan 14:00da boshlanadi.