“So‘g‘diyona” – “Andijon” (1:2) o‘rtasidagi uchrashuvdan keyin mehmonlar bosh murabbiyi Aleksandr Xomyakov o‘z taassurotlari bilan o‘rtoqlashdi.

— Albatta, g‘alabadan hech qanday mubolag‘asiz juda xursandman. To‘g‘ri, o‘yinning oxirgi daqiqalari ancha asabiy o‘tdi. Lekin umumiy ma’noda, o‘yindan va natijadan qoniqdim. Ha, o‘yin nazorati boshidan bizda bo‘lgan bo‘lsa-da, kutilmaganda darvozamizdan to‘p o‘tkazib yubordik. Bu esa vaziyatni o‘nglashimiz uchun bizga ancha qiyinchilik tug‘dirdi. Birinchi bo‘limda qanotlardan ham yaxshi harakat qilishga, to‘p nazoratini saqlab turishga intildik. Qarshi hujumlarda ham chakki emasdik. Biroq birinchi bo‘limda natija biz o‘ylagandek bo‘lmadi. Xudoga shukurki, ikkinchi bo‘limda vaziyatni o‘ngladik. Oldingi intildik va kerakli gollarni urdik. Aslida vaziyatni o‘z qo‘limizga olib, shoshilmasdan harakat qilib, o‘z imkoniyatlarimizdan foydalanganimizda uchrashuv oxirida bunchalik asabiylashmasdik. Lekin vaziyatlardan foydalana olmaganimiz tufayli bahs so‘nggi asabiy tarzda kechdi. Bir nechta holatlarda darvozabonimiz bizni gollardan qutqarib qoldi. Bu ham g‘alabamizda muhim omillardan biri bo‘ldi. Barcha yigitlarga borlarini berib, muvaffaqiyatga erishganlari uchun minnatdorchiligimni bildirib qolaman. O‘z o‘rnida muxlislarimizga ham katta rahmat. Bundan keyin ham oldinga intilishda davom etamiz.

— “Andijon” futbolchilari ko‘p vaziyatlarda to‘pni yo‘qotdi. Bu nima bilan bog‘liq?

— To‘g‘ri, birinchi bo‘limda o‘yinimiz unchalik qovushmadi. Fikringizga qo‘shilaman, ba’zi vaziyatlarda to‘pga chiqishga aniqlik yetishmadi. Maydon markazidagi ayrim xatolarimiz bizni qiyin holatga tushirib qo‘ydi. Ayniqsa, raqibning qarshi hujumlari xavfli ekanligini oldindan his qilgandik. Raqibimiz xatolardan va qarshi hujumlardan yaxshi foydalana olishini hamda bu borada yaxshi o‘yinchilarga ega ekanini oldindan bilardik.

— Hakamga e’tirozlaringiz bormi?

— Yo‘q, qanday e’tirozim bo‘lishi mumkin? Ularga hech qanaqa e’tirozim yo‘q. To‘g‘ri, emosiyaga boy o‘yin bo‘ldi. Men ham bir-ikki marta o‘yinchilarga ko‘rsatma berganimda baqirgandek bo‘ldim. Umuman, emosiyalarga boy o‘yin bo‘ldi, deyish mumkin.

— Hakam texnik zonaga kelib yordamchi murabbiyingizga sariq kartochka ko‘rsatdi...

— Aytganimdek, emosiyalarga boy o‘yin bo‘ldi. Ko‘rsatma beraman deb oldinroqqa chiqqan bo‘lishi mumkin. Bu albatta g‘alabani saqlab qolish yo‘lida yigitlarga ko‘rsatma berish niyatida bo‘lgan. Bu vaziyatda atayin qilinmagan. Umumiy ma’noda, hakamlarga e’tirozim yo‘q. Ha, Farhod Sohibjonovga qizil kartochka ko‘rsatilgani yoqimsiz bo‘ldi. Uchrashuvni yaxshi boshlay olmadik, vaziyatlardan foydalanolmadik. Jamoamizga jon kuydirgan va ortimizdan kelib muxlislik qilgan “Andijon” ishqibozlariga o‘z minnatdorchiligimni bildirib qolaman.

— Zaxiradan futbolchilarni maydonga tushirishingiz yana o‘zini oqladi. Masalan, Sohibjonovni hal qiluvchi golni urishini sezganmidingiz?

— Yuqorida qisman bu haqida javob berib o‘tdim. Shuningdek, Abdurahmon Komilov maydonga tushgach, penalti ishladi. Sohibjonov esa gol urdi. Albatta, oldindan rejalashtirib qo‘ygandik. Bilasizmi, hamma futbolchilar maydonga tushishga loyiq va barchalari g‘alaba qozonishga intilib turadilar. Shu bois hammasi oldindan rejalashtirilgan. Juda xursandman. Jamoadagi barchaga o‘z minnatdorchiligimni bildiraman. G‘alabaga bo‘lgan ishtiyoqi uchun futbolchilarimga rahmat.

“Andijon” matbuot xizmati.