“Arsenal” darvozaboni David Rayya “Chelsi” bilan o‘yinda ikki qo‘pol xatoga yo‘l qo‘ydi. Mudrikning golidan tashqari, Palmerga to‘pni berib qo‘ygan vaziyat uchinchi golga sabab bo‘lishi mumkin edi.

Aslida darvozabon xatolari futbolning bir bo‘lagi, xato qilmagan posbon yo‘q, eng zo‘rlarining ichida ham. Keyingi o‘yinda yana yaxshi o‘ynab ketish mumkin. Lekin Rayyaning holati biroz farqli. Xatoning ta’siri, yuzaga keltiradigan ortiqcha bosim nuqtai nazaridan, qaysidir ma’noda Rayya endi Onananing vaziyatiga tushib qoldi.

Sababi, “Arsenal”da Ramsdeyl bor, so‘nggi mavsumni juda yaxshi o‘tkazgan, umuman olganda, balkim almashtirish shart bo‘lmagan vaziyatda saviya jihatidan unchalik katta farq qilmaydigan boshqa darvozabonga almashtirildi. Tabiiyki, buni Ramsdeylga nisbatan nohaqlik deb hisoblaydiganlar ham, uni Rayyadan yaxshiroq deb hisoblaydiganlar ham yetarlicha topiladi. Natijada, allaqachon Ramsdeylni qaytarish kerakligini haqidagi izohlar ham ko‘payib ketdi. Masalan, Ederson yoki Alison xato qilsa, boshqa darvozabon olib kelish yoki zaxiradagisi bilan almashtirish masalasi ko‘tarilmaydi-ku,to‘g‘rimi?

Aslida, qaysidir jihatdan Ramsdeylning asosiyga aylanishi ham shunaqaroq holatda bo‘lgandi. Leno yoki “Aston Villa”ga berib yuborilgan Martinesdan yaxshiroq ekani isbotlanmagan Ramsdeyl ham shubhalar asosida faoliyatini boshlagan, keyin biz uning juda kuchli xarakterga ega ekanini bilib ham oldik.

Keyingi o‘yinlarda David Rayya mahoratdan ham ko‘proq ruhiyat imtihonidan o‘tadi. Har bir harakati boshqacha rakursda tahlil qilinadigan vaziyatda ispaniyalik darvozabon yana o‘zini o‘nglab, xarakterini namoyish qila oladimi yoki navbatdagi xatoni ko‘ramizmi? Qiziq savol.

Qahramon Aslanov.