O‘zbekiston – Yaponiya uchrashuvidan so‘ng (0:2) matbuot anjumani tashkil etildi.

O‘zbekiston ayollar terma jamoasi bosh murabbiyi Midori Xonda unda ishtirok etdi. 

«Har ikki jamoa g‘alaba qozonish uchun harakat qildi. Yaponiya juda kuchli jamoa, ularga qarshi bahs biz uchun katta tajriba bo‘ldi. Yaponiyalik futbolchilar to‘p bilan yaxshi muomala qilishdi va kuchli o‘yin namoyish etishdi.

Dastlabki daqiqalar biz uchun murakkab o‘tdi. Ikkita tezkor gol o‘tkazib yuborgan bo‘lsakda, qarshi hujumlarga tayandik. Biroq futbolchilarning ruhiyati tushmadi va aksincha yanada kuchliroq o‘yin ko‘rsatishga harakat qildik.

Asosiy maqsadimiz 3-saralash bosqichiga yo‘l olish, shu sababdan Hindiston bilan o‘yinda faqat g‘alaba uchun maydonga chiqamiz», – dedi Xonda. 

Yaponiya ayollar terma jamoasi bosh murabbiyi Futoshi Ikeda quyidagi fikrlarni bildirdi:

«Guruhdagi asosiy uchrashuvda chiroyli g‘alabaga erishdik. Ushbu bahs uchun o‘z rejalarimiz bor edi. Barcha futbolchilar o‘zlariga yuklatilgan vazifalarini a’lo tarzda bajardi. Vyetnamga qarshi o‘yinda ham g‘alaba uchun maydonga chiqamiz. Biroq futbolchilarning jismoniy holatiga ham e’tibor qaratamiz».