Ўзбекистон – Япония учрашувидан сўнг (0:2) матбуот анжумани ташкил этилди.

Ўзбекистон аёллар терма жамоаси бош мураббийи Мидори Хонда унда иштирок этди. 

«Ҳар икки жамоа ғалаба қозониш учун ҳаракат қилди. Япония жуда кучли жамоа, уларга қарши баҳс биз учун катта тажриба бўлди. Япониялик футболчилар тўп билан яхши муомала қилишди ва кучли ўйин намойиш этишди.

Дастлабки дақиқалар биз учун мураккаб ўтди. Иккита тезкор гол ўтказиб юборган бўлсакда, қарши ҳужумларга таяндик. Бироқ футболчиларнинг руҳияти тушмади ва аксинча янада кучлироқ ўйин кўрсатишга ҳаракат қилдик.

Асосий мақсадимиз 3-саралаш босқичига йўл олиш, шу сабабдан Ҳиндистон билан ўйинда фақат ғалаба учун майдонга чиқамиз», – деди Хонда. 

Япония аёллар терма жамоаси бош мураббийи Футоши Икеда қуйидаги фикрларни билдирди:

«Гуруҳдаги асосий учрашувда чиройли ғалабага эришдик. Ушбу баҳс учун ўз режаларимиз бор эди. Барча футболчилар ўзларига юклатилган вазифаларини аъло тарзда бажарди. Вьетнамга қарши ўйинда ҳам ғалаба учун майдонга чиқамиз. Бироқ футболчиларнинг жисмоний ҳолатига ҳам эътибор қаратамиз».