«Dinamo» PFK matbuot xizmati 17 yillik an’anasini davom ettirib, 2023 yilgi mavsum yakunlariga ko‘ra muxlislar o‘rtasida so‘rovnoma o‘tkazib, jamoaning 2023 yildagi eng yaxshi o‘yinchisini aniqladi.

«Dinamo» jamoasi bu yil Pro ligadan Superligaga yo‘llanma oldi va O‘zbekiston kubogida ham yarimfinalgacha yetib keldi. Ovoz berish yakunlariga ko‘ra, jamoa to‘purari Kojo Joel eng ko‘p – 1552ta ovoz bilan (73 foiz) «Dinamo» jamoasining 2023 yildagi eng yaxshi o‘yinchisi deb topildi. U Pro ligada 17 o‘yinda 12ta gol, O‘zbekiston kubogida esa 4ta gol kiritdi.

Butun mavsum davomida barqaror o‘yin ko‘rsatgan samarqandlik himoyachi Salim Mustafoyev 378ta ovoz (17 foiz) bilan 2-o‘rindan joy olgan bo‘lsa, markaziy himoyada ishonchli o‘yinlari bilan muxlislar e’tirofiga sazovor bo‘lgan Xurshidbek Ubaydullayev 335ta ovoz (15 foiz) uchlikni yakunlab berdi.

Keyingi o‘rinlardan Fransis Narx (265ta ovoz), Bahodir Nasimov (250ta ovoz), Dilshod Rahmatullayev (249ta ovoz), Koike Yudai (230ta ovoz) joy olgan.

Ma’lumot uchun, 2007 yildan buyon mavsum yakunlariga ko‘ra, «Dinamo»da «yil o‘yinchisi» aniqlanib kelinmoqda. Laureatlar bilan tanishing:

«Dinamo»ning «yil futbolchisi» nominasiyasi g‘oliblari:

2007 yil – Farhod Tojiyev
2008 yil – Ilyos Qurbonov
2009 yil – Bahodir Nasimov
2010 yil – Ilhom Yunusov
2011 yil – [Devid Oniya]
2012 yil – Ivan Nagayev
2013 yil – Andrey Melnichuk
2014 yil – Andrey Melnichuk.
2015 yil – Kamoliddin Murzoyev.
2016 yil – Amirjon Safarov.
2017 yil – Jasur Azimov.
2018 yil – Akmal Xolmurodov.
2019 yil – Botirali Ergashev
2020 yil – Damir Temirov
2021 yil – Shohruxbek Abdurahmonov
2022 yil – Marat Bikmayev
2023 yil – Kojo Joel

«Dinamo» PFK matbuot xizmati.