14ta gol - Chexiya chempionatidan o‘rin olgan o‘yinda g‘ayritabiiy yuqori mahsuldorlik qayd etildi. «Fastav Zlin» va «Mlada-Boleslav» bahsi 5:9 hisobida yakunlandi. 1ta o‘yinda 14ta gol, yana elit divizionda! Birinchi bo‘lim nisbatan sokin o‘tdi, ya’ni mezbonlar tanaffusga 2:1 hisobida chiqib ketishdi. To‘g‘ri, 3ta gol ham 11-15-daqiqalar oralig‘idagi qisqa vaqtga to‘g‘ri keldi. Keyin ma’lum bo‘ldiki, bu boshqacha gollar yomg‘iridan nishona ekan.

O‘yinning 64-daqiqasida hisob allaqachon 5:4ga yetgandi - «Mlada» tanaffusdan chiqqach, darhol 3-golni qabul qildi, keyin qandaydir 11 daqiqa ichida raqib darvozasini 4 bora nishonga oldi. Yakunda mehmonlar 9:5 hisobida g‘alaba qozonishdi. Ular hattoki, 90Q5-daqiqada ham hujumga o‘tishdaye to‘xtashmadi. Xullas, bitta o‘yinda 14ta gol, shundan 11tasi ikkinchi bo‘limda! Boz ustiga, 14ta gol qayd etilgan bahsda biror futbolchi samaradorlik bobida yaqqol ajralib turgani yo‘q. Lekin birdaniga 3 nafar futbolchi «dubl»ga erishdi. To‘g‘ri, hujumchi Vasil Kushej 2ta goldan tashqari, 2ta samarali uzatmaga ham mualliflik qildi.

«Mlada» bosh murabbiyi Marek Kulich o‘yindan keyin yakuniy natijadan hayratlangani, ammo u uncha mamnun emasligini yashirmadi: «Bunaqasi 100 yilda bir marta bo‘ladi. Tanaffus vaqti kiyinish xonasida asabiy holat kuzatildi, shogirdlarimga ilk marta shunday qattiq baqirdimki, ovoz pardam yirtildi go‘yo. Yo‘q, ikkinchi bo‘limda uncha zavqlanmadim. Deylik, kimlar qanday gol urishganini ham eslab qololmadim. Qolaversa, 5ta gol qo‘yib yuborganimiz... Boz ustiga, avvalgi o‘yinda darvozamizdan 4 marta to‘p olib chiqqandik. Bu - fojia...». «Zlin» ustozi Pavel Vrba esa «shok»ka tushgani, lekin jamoasi qanday qilib 5ta gol urganini aslo tushunmaganini ta’kidladi. Ma’lumot uchun, «Mlada» turnir jadvali peshqadami bo‘lsa, «Zlin» oxirgi o‘rinda.