Hujumkor yarim himoyachi Matteo Politano "Napoli" bilan hamkorlikni uzaytirishga yaqin turibdi, bu haqda jurnalist Nikolo Skira ijtimoiy tarmoqlar orqali xabar berdi.
Insayderning xabar berishicha, yaqin kunlarda klub rahbariyati futbolchining agenti bilan uchrashuv o‘tkazadi va unda yangi shartnomaning barcha tafsilotlari kelishib olinadi. Politanoning o‘zi ham "Napoli"da qolish istagini bildirdi.
Italiya chempionatining joriy mavsumida 30 yoshli vinger 11 ta o‘yin o‘tkazib, 5 ta gol va 3 ta golli uzatmani amalga oshirdi. Tomonlar o‘rtasidagi amaldagi shartnoma 2025 yilning yozida yakuniga yetadi.
