«Yunayted» yaqin orada klubning 25%ini INEOS egasi ser Jim Retkliffga sotganini e’lon qiladi. Bunda yangi homiylar sport siyosati bo‘yicha boshqaruvni qo‘lga oladi. Eski xo‘jayinlar esa moliyaviy masalalarda yana o‘z mavqelarini saqlab qoladi. Britaniyalik funksioner aksiyalarning chorak qismi uchun 1,25 milliard funt to‘laydi.
Kelishuv doirasida britaniyalik milliarder Retkliff «Manchester Yunayted»ning futbol faoliyati ustidan nazoratni o‘z qo‘liga oladi va kelajakda klubni to‘liq qo‘lga olish ehtimoli bor.
Biroq INEOS allaqachon Fransiya 1-ligasining «Nissa» va Shveysariya Superligasining «Lozanna» klubiga egalik qiladi va Kot-d'Ivuarning «Rasing Klub Abidjan» klubi bilan hamkordir.
«Nissa» ayni damda Liga 1da peshqadam «PSJ»dan atigi bir ochko ortda qolgan holda ikkinchi o‘rinni egallab turibdi va keyingi mavsumda Chempionlar ligasiga yo‘llanmani qo‘lga kiritish imkoniyatiga ega.
Agar Retkliff hozirgi shartnomasini yakunlasa va har ikki jamoa ham Chempionlar ligasiga yo‘llanmani qo‘lga kiritsa, «Nissa» va «Yunayted» kelasi mavsumda Yevropada raqobatlasha oladimi, degan savollar tug‘iladi.
UYEFA qoidalariga ko‘ra, agar klub egalari ikkala jamoa ustidan «hal qiluvchi ta’sir»ga ega bo‘lsa, klublarni musobaqadan chetlatishga asos tug‘iladi.
UYEFA klublar musobaqalari reglamentining 5-moddasi musobaqaning yaxlitligi va bir nechta klublarga egalik huquqini ifodalaydi: qoidalar bir shaxs yoki shaxslar guruhi tomonidan boshqariladigan ikkita jamoaning bir musobaqada ishtirok etishini taqiqlaydi.
2017 yilda UYEFA Red Bull'ning «Leypsig» va «Zalsburg» klublari orasidagi egalik huquqini tekshirdi va moliyaviy ekspertlar ularning egalik guruhi ikki klubning boshqaruv tuzilmasida noqonuniy harakatlar qilmaganini aniqladi. Shundan so‘ng ikkala klubga Chempionlar ligasida ishtirok etishga ruxsat berildi.
Retkliffning INEOS kompaniyasi faqatgina «Yunayted»ning ozchilik ulushini sotib olayotganligi sababli, UYEFA qoidalari «Nissa» va Premyer-liga klubiga bir vaqtning o‘zida Chempionlar ligasida ishtirok etishiga ruxsat beradi.
