"Manchester Yunayted" yarim himoyachisi Kazemiro qishki transfer oynasida jamoani tark etib, Saudiya Arabistoniga o‘tishni istamayapti, deb xabar bermoqda jurnalist Ben Jeykobs.

Oldinroq 31 yoshli braziliyalik futbolchiga Saudiya ligasi klubidan qiziqish borligi, Manchester rahbariyati esa Kazemironi qulay shartlarda sotishdan manfaatdor ekani haqida xabar berilgandi.

Kazemiro 2022 yilning avgustida "Real"dan "Manchester Yunayted"ga o‘tgan edi. Transfer summasi 70,65 million yevroni tashkil etdi. O‘yinchining klub bilan shartnomasi 2026 yilning yoziga qadar mo‘ljallangan. Transfermarkt Kazimironi 40 million yevroga baholamoqda.

Joriy mavsumda braziliyalik futbolchi 12 ta o‘yinda maydonga tushib, 4 ta gol urdi va 1 ta golli uzatmani amalga oshirdi.

12 turdan keyin "Manchester Yunayted" 21 ochko bilan APL turnir jadvalida oltinchi o‘rinda bormoqda.