Yaponiyalik Takefusa Kubo joriy mavsum munosib statistikasi bilan nazarga tushdi.
22 yoshli yarim himoyachi «Real Sosyedad» libosidagi jami 13ta o‘yinda 5ta gol urishdan tashqari, 3ta samarali uzatma muallifiga aylandi. Yaponiya milliy jamoasi umidi Ispaniya kubogidan o‘rin olgan «Bunyol»ga qarshi o‘yinni esa zaxira o‘rindig‘ida kuzatdi. Bu hol kichik shaharchadagi oddiyroq stadionda yil ayirboshlashi amalga oshishiga imkon yaratdi.
Stadionda tribunalar va maydon hududini ajratib turgan to‘siqlar yosh muxlislardan birining Takefusadan futbolka olishiga xalaqit bergani yo‘q. Shaddod bolakay shunchaki, «Sosyedad» zaxira o‘rindig‘iga yaqinlashdi va ishonch bilan baqirdi: «Kubo! Menga o‘z futbolkangni bera olasanmi?» Yaponiyalik yosh yarim himoyachi esa yosh muxlis iltimosini qondirdi. Quvonganidan o‘z ichiga sig‘magan bolakay qadrli «o‘lja»ni olishi bilan ota-onasi tomon yugurdi. Kuboning futbolkasi unga ancha katta ekanligi o‘z-o‘zidan tayin, lekin bu muammo emas, to‘g‘rimi?
Asosiy voqelik keyin kuzatildi: bolakay «Yaxshilikka yaxshilik» tushunchasiga amal qilib, ortga qaytdi va Kuboni yana bir bora ishonch bilan chaqirib, unga chips qutisini tutqazdi. Sovg‘aga javoban minnatdorchilik! Ha, bolakay aftidan, hayot haqida ma’lum tushunchaga ega ko‘rinadi. Baxtiyor muxlis shundan keyingina quvnoq holda o‘z o‘rniga qaytdi. Kubo esa chipsni «Sosyedad» zaxirachilari bilan baham ko‘rdi. Xullas, yil barteri!
