Futbol tarixida yana bir ajib hodisot ro‘y berdi - Chexiya chempionati quyi divizioni (havaskorlar ligasi) ishtirokchisi - «Cokol» (Upoglava) futbolchilari birdaniga 16ta sariq kartochka olishdi - ulgurji xarid. Qanaqasiga, nima ular hakamni do‘pposlashdimi? Ehtimol, qandaydir to‘polon ko‘tarishgandir...? Yo‘q, gap boshqa tomonda.

Upoglavaliklar 4 noyabr kuni «Libochovan Cokol»ga qarshi maydonga tushishdi va 55-daqiqaga qadar raqibdan javobsiz 6ta gol qabul qilishdi. 82-daqiqaga kelib, Martin Blijil kamtarin jamoaning birinchi javob golini urdi va barcha futbolchilar (zaxiradagilar ham) uni formani yechish bilan nishonlashdi. Hakam esa qoida bo‘yicha ish ko‘rib, jami 16 nafar futbolchini birma-bir sariq kartochka bilan «mukofotladi». Eng e’tiborli tomoni, oradan 4 daqiqa o‘tib, «Sokol» raqib darvozasini yana bir bora ishg‘ol qildi. Xayriyatki, bunisida biror futbolchi egnidagi libosni yechishga jazm etgani yo‘q. Aks holda, qoidadon hakam hammani maydondan chetlashtirardi katta ehtimol... Yakunda «Sokol» 6:2 hisobida yengildi, lekin 16ta sariq kartochka tufayli bir zumda tanildi.

Ma’lum bo‘lishicha, upoglavaliklar o‘yin tanaffusida o‘zaro kelishib olishgan ekan. «Deyarli barcha o‘yinlarda gol urolmay, mag‘lubiyatga uchrayapmiz. Qisqasi, kiyinish xonasida kimdir agar loaqal 1ta gol ursak, uning sharafiga futbolkalarni yechish taklifini o‘rtaga tashladi. Bizda buning uchun jarima yo‘q, faqat noo‘rin tarzda sariq kartochka olgan futbolchigina jamoani ichimlik bilan mehmon qiladi», - deya Voytex Gorki (jamoa futbolchisi) so‘zlarini keltirdi tn.nova.cz sayti.